Truck tipo “Tanker Pumper” ta bay reforza flota di Departamento di Bombero

ORANJESTAD (AAN): Minister di Husticia, mr. Andin Bikker, den presencia di Presidente di Parlamento, representantenan di Sindicato SINBA y e Management Team di Departamento di Bombero,

a firma pa adkiri un truck nobo. Esaki den cuadro di e esfuerso continuo y urgente pa percura pa mas material di trabou nobo pa entre otro e Departamento di Bombero. E esfuerso y dedicacion den e caso aki ta uno mutuo, hiba hunto cu coleganan di Gabinete Wever-Croes, Sindicato SINBA y e Management Team di Cuerpo di Bombero.

Un Task Force special di Departamento di Bombero, den cual Sindicato SINBA y e Management Team tin representacion, a duna un recomendacion despues di un bishita na Merca pa inspecciona diferente opcion, ki tipo di trucknan ta mas adecua pa Brandweer. Door cu e trucknan recomenda ta modelonan pa cual tin hopi demanda debi cu nan ta cla fabrica (normal ta tarda entre 7 pa 9 luna pa por fabrica un truck special pa bombero), Minister Bikker a inicia un proceso acelera pa adkiri e trucknan cu e Task Force a recomenda.

Y cu su rason, ya cu den menos di un siman, dos di e trucknan recomenda pa e Task Force a wordo adkiri door di otro Departamentonan di Bombero na Merca. Finalmente Gobierno a bin logra cu por adkiri un di e trucknan recomenda, cual proceso di bestelling awo a keda formalisa a base di un decreto ministerial y cu firmamento di un contrato cu NASA, cu ta e agente exclusivo di fabricante Rosenbuaer America, LLC, pa Aruba, Corsou y islanan BES.

Ta trata di un truck tipo “Tanker Pumper”, masha moderno y sofistica, cu ta bay reenforsa e flota di trucknan di e Departamento di Bombero. E personal di Departamento di Bombero tin amplio experiencia di training y cu mantencion di trucknan di e marca aki, ya cu e Departamento tin varios truck di dicho marca.

Minister Bikker ta gradici y felicita coleganan di Gabinete Wever-Croes Sindicato SINBA, e Management Team y e Cuerpo di Bombero, cu e logro importante aki di por a adkiri un truck specialisa pa e Departamento di Bombero.

E mandatario a informa Sindicato SINBA cu e ta finalisando un documento di traspaso pa e proximo Minister di Husticia, cu e temanan y ekipo di trabou cu a keda pendiente, pa e mandatario nobo por sigui avansa rapidamente riba esakinan.