Renovacion di bañonan di Pius X School ta un iniciativa conhunto cu alumnonan y Divi Impact Foundation

Siguiendo e proyecto “Raad van Kinderen” di Princess Laurentien:

ORANJESTAD (AAN) – Den conferencia di prensa, relaciona cu e renovacion di e bañonan na Pius X School, cu ta un proyecto ehecuta pa Divi Impact Foundation, Juffrouw Sheila Lazo-Tromp, director di e scol, a splica con e iniciativa aki a origina.

El a expresa cu e aventura aki a cuminza, en principio, cu un proyecto yama “Raad van Kinderen” cu a start for di Princess Laurentien, y nan a dicidi pa bin Aruba unda cu un compania ta presenta un dilema cu e tin pa su trahadornan, anto nan a pensa cu kizas e muchanan por tin ideanan “out of the box” cu kizas e adultonan no tin. E proyecto a cuminza den scolnan como seis aña pasa, segun e cabesante ta corda, y tabata tin cuater scol cu a cuminza cu esaki.

“ Entre otro, Pius X School tabata cu Divi cu un di e dilemanan aki, unda cu Divi a presenta un problema y nos muchanan a presenta posible solucionnan, y esaki a hiba nos en principio, e aña ey mes, pa un ‘Brons Award’ na Hulanda, cu e tempo ey e Fundacion di Princess Laurentien tabata tin, a duna nos pa loke e muchanan a presenta pa e compania cu tabata Divi & Tamarijn All Inclusive.

E siguiente aña nos a sigui cu e compania, a bolbe presenta un proyecto y e aña ey nos a bay pa un ‘Silver Award’, y eynan mi ta kere cu ta unda meneer Nieuwmeyer (den feliz memoria) a wak cu, loke nan a logra hunto cu Pius-X nan tabata kier un pay bek pa e scol. Anto eynan e proyectonan a cuminza cu airco, e tempo ey, cu tabata na un forma cu tur e klasnan a haya airco. Despues a sigui cu un forma di adopta Pius X, mirando e infrastructura y e sistema di enseñanza, y asina nos a yega cu te awe nos tin e bañonan. Esaki ta algo cu semper nos a motiva scolnan pa participa den algo asina, pero tambe motiva otro companianan pa nan tambe bin cu iniciativanan asina pa scol.

“Berdad nos scolnan ta cay bao cierto directiva, y ademas tin Gobierno, pero nos ta pensa cu ta nan deber, pero hopi biaha si bo sinta warda nos lo no ta unda nos ta aworaki”, Cabesante Sheila Lazo-Tromp a subraya.

El a agrega cu sin companianan cu tambe por haci esaki, e lo ta hopi bon na bienestar di nos muchanan mes, mescos cu Divi Impact Foundation, ta haciendo.

E dama a splica tambe cu ora el a tuma e liderazgo di Pius X School, nan a cuminza cu un fondo unda docentenan mes tabata pone cierto suma di placa pa luna, y hunto cu esey nan tabata purba traha na scol.

“Masha dificil e mantencion di scolnan tabata den pasado, y asina nos a cuminza unda scol mes a traha un fondo, unda nos tabata yuda e muchanan di menos recurso, pero tambe nos tabata pone un parti. Despues a bin cu nos tabata haci diferente actividad hunto cu e mayornan, manera bingo, caminata, pa genera fondo pa nos traha na scol. Nos ta drecha scol, nos mes ta verf. Nos ta purba y nos tin mayor cu ta yuda nos boluntariamente”, cabesante Sheila Lazo-Tromp a indica.