Gianaika Van der Biezen, FPNC:
ORANJESTAD (AAN) Gianaika van der Biezen, director di Fundacion Pa Nos Comunidad (FPNC), den entrevista cu DIARIO, a indica cu nan tin un grupo di adulto mayor, cu nan entrada ta keda den un pensioen mas abao, of nan no ta cay na remarca den e sistema di pensioen, anto esaki ta keda tiki pa e personanan aki. Of, por ta nan no tin un yiu of un famia cu por brinda nan un extra ayudo.
“Tin biaha nos tin fondonan special, of nos tin cumindanan cayente; esaki no ta algo structural pero ora nos tin esaki, nan ta e promenan riba lista pa haya e ayudo”, van der Biezen a relata.
El a agrega cu personanan den comunidad cu kier yuda, semper por tuma contacto cu FPNC , of colabora cu pakete. E fundacion ta depende di fondonan of donacion di articulonan.
Pa adultonan mayor e fundacion a desaroya un proyecto caba y a base di esaki nan ta traha y brinda e ayudo.
Tur adulto mayor tin diferente situacion y FPNC ta purba di bay na lo basico, segun director di e fundacion.
“Nos ta traha di cerca cu personanan cu tin problema mental, y esaki ta algo cu ta hopi den media, ultimamente. Esaki nos ta purba di tin un oido mas cerca di dje. Nos ta traha cu tur e instancianan, manera Respaldo, Stichting Hunto, p’asina purba brinda ayudo na esnan cu tin mester di dje”, Gianaika van der Biezen a señala.
Pa e lunanan nos dilanti e fundacion tin cu bolbe cumpra e productonan, haya donacionnan bek y esey ta keda semper nan preocupacion cu nan tin.
“Tur granito lo yuda, si ta un dunador, of si ta un compania, loke bo por trece hacie di bo mes, bo ta bin akinan na e fundacion, of por yuda nos boluntario tambe wak con esaki ta hinca den otro. El a comenta cu semper tin dos supermercado cu ta yuda e fundacion, unda nan ta pone un baki; e consumidor por cumpra y pone eynan su donacion”, Gianaika van der Biezen a conclui.
