Trayecto di Formacion Social ta 4 luna di training estilo militar y 8 luna di stage y curso

Jessica Ras: ORANJESTAD (AAN): Durante un conferencia di prensa Diahuebs tocante e trayecto di Formacion Social pa hende muher,

hefe di SVT Jessica Ras a hiba palabra.

El a splica cu e ta orguyoso di e hecho cu e aña aki ta e di 10 aña cu ta haciendo e trayecto.

“E aña aki ya caba 12 grupo a finaliza y ta bunita pa tende e bunita storianan di hobennan cu a ‘struggle’ y despues di cumpli cu e programa di SVT nan ta bon para den bida, unda cu nan y nan famia ta contento”.

Bo ta wak cu SVT ta brinda un oportunidad na hobennan cu eyfo nunca tabata tin un chens y nan ta drenta SVT y no solamente di nos nan ta haya apoyo, sino tambe di Gobierno di Aruba, cu ta keda apoya e trayecto di Aruba, mescos cu Mariniers Kazerne, segun Ras.

El a sigui bisa cu ya caba tin diferente hende muher hoben cu a bay inscribi pa participa na e programa di Formacion Social.

Ras a duna un splicacion tambe di e trayecto, unda cu el a indica cu pa cada grupo a programa ta dura 1 aña largo, den dos parti.

Un parti ta un parti estilo militar y si bo ta un persona cu a caba MAVO, despues di e trayecto bo por aplica pa drenta den e opleiding mes di Arumil.

El a indica cu e parti mas grandi ta ora cu nan ricibi nan baret despues di 4 luna di training via Mariniers Kazerne.

Despues di esaki ta sigui un periodo di 8 luna unda cu e participantenan di e trayecto ta bay core stage na un compania y nan ta haya diferente curso.

Tur Diaranzon si e participantenan ta bek na Mariniers Kazerne pa sigui haya les den disciplina.

Tin tambe momentonan cu ta haci deporte, ta bay riba excursion y ta duna e participantenan workshops.