E “Hangua nacional di vacunacion” na Aruba ta marca 59%

ORANJESTAD (AAN):  Cifranan di Departamento di Salud ta mustra cu te cu diaranson 19 di Mei pa 7:30 pm un total di 58,682 persona a vacuna.

A haya e prome dosis di e vacuna un total di 21,367 persona y e haya e di dos dosis un total di 37,315.

E total di vacuna aplica ta 95,997.

E “Hangua nacional di vacunacion” di Ministerio di Salud y Departamento di Salud Publico na Aruba ta marca 59%.

Den e grafico por wak e cantidad di hende di 18 te cu 59 aña cu a vacuna y esnan di e grupo aki cu falta pa yega na e meta, mescos tin un di dos column pa esnan 60+.

Den e parti ariba, e “HANGUA NACIONAL DI VACUNACION” ta mustra e porcentahe meta cu ta pa vacuna 85% di nos comunidad (liña cora) y tambe ta demarca e porcentahe cu a wordo alcansa actualmente (liña geel).

Pero dicon vacuna 85% di nos poblacion ta e meta? Bo a yega di scucha e termino “herd immunity”?

“Herd Immunity”, inmunidad colectivo (of di grupo) ta ora un number suficiente di individuo ta proteha contra un infeccion determina, den e caso aki COVID-19, y ta actua como barera cu ta evita cu e infeccion yega na esnan no proteha.

Pa logra “herd immunity”, inmunidad colectivo (of di grupo) contra COVID-19 na Aruba, nos mester vacuna 85% di nos ciudadanonan.

Ban sigui vacuna pa nos por progresa y recupera...y finalmente ‘move on’!