Trahadornan publico ta esnan cu ta sigui sufri mientras cu Gobierno keto bay no por baha su gastonan

Sindicato Simar a indica

ORANJESTAD (AAN): Riba Dialuna un cantidad di Sindicato di Aruba, hunto cu algun di Curaçao y tambe St. Maarten tabata riba e isla (como tambe via reunion virtual) pa asina probecha di e chens ofreci door di Secretario di Estado Hulandes, Alexandra van Huffelen, pa reuni cune.

   Josephine Albertus di Sindicato Simar na Aruba a confirma cu e Sindicatonan a entrega e carta na Van Huffelen.

   Tambe Sindicatonan di Aruba a splica Van Huffelen cu contrario cu e isla di Curaçao y St. Maarten unda nan a yama e Sindicatonan pa discuti e asunto... na Aruba ta via di un Conferencia di Prensa numa e Sindicatonan a bin haya sa por ehemplo e asunto di recorte di 5 porciento.

   Sindicatonan ta lamenta cu Gobierno ta pinta e imagen na pueblo cu tur cos ta done deal, siendo cu e no ta asina.  Ora di pidi Gobierno pa haya puntonan preto riba blanco, esey tampoco no ta wordo honra.  Aki ta referi na e promesa haci algun tempo pasa cu te na 2023 lo bay kita e recorte di 12,6% di e empleadonan publico.

   E situacion financiero ta hopi precario cerca ciudadanonan na Aruba, y Sindicatonan sa cu esey tabata asina prome cu e Pandemia a start.  Empleadonan publico a perde 12.6%, mientras cu algun tin nan partner biba na cas cu nan cu a perde empleo, pues e situacion ta fastioso.  Pues awor ta wardando pa Juli 2022 pa haya e 5%.

   Sindicatonan tabata simplemente pidi Gobierno pa duna e empleadonan publico e ‘garantia’ cu esey lo socede, pero Bestuurscollege no por duna e garantia ey.  Sindicatonan ta haya esaki un falta di respet.

   Sindicatonan a mustra cu pa dos aña caba e empleado publico a entrega parti di su salario, mientras cu Gobierno mes no a baha si gastonan.  Desde 2018 cu Gobierno a firma di lo baha gasto, awor na 2022 por a mira e presupuesto aproba pa Parlamento ta indica claramente cu ainda Gobierno no a reduci su gastonan.

   Pa colmo, recien a saca e Uitvoeringsrapportage di 1er cuartal di 2022, unda ta mira claramente cu Gobierno ta tumando hende den Dienst atrobe.  Kiermeen e fiesta ta sigui pa crea gasto, y esnan cu tin di sufri ta e trahadornan den sector publico.