ORANJESTAD (AAN)- Varios ciudadano cu ta haya cuido medico cerca e docter di cas na Paradera,
a mustra nan preocupacion na mesa di redaccion di DIARIO, ya cu nan a scucha cu dr. Wijngaarde ta bayendo Hulanda back, pasobra su periodo di stage na Aruba, cu ta tres luna, a termina.
Dr. Wijngaarde ta un bon docter, el a gana e curazon di su pashentnan y incluso ta un di e poconan cu hasta ta haci bishita di control na cas, ora e pashent ta rekeri di esey.
E pashentnan cu ta acudi na e consultorio medico aki a scucha tambe cu no ta bay tin reemplazante pasobra no tin docternan di cas pa yena e vacatura aki, y e pregunta cu nan tin ta si e distrito di Paradera ta bay keda sin consulta di docter di cas, y na unda e pashentnan aki lo tin cu bay, pues, cerca cual docter.
Mirando cu ta varios yamada riba e mesun inkietud aki DIARIO a atende, redaccion a purba di haya contacto cu PR señora Solange Tchong, pero no a logra haye. E ta un persona cu semper ta yama pa duna informacion of un reaccion, y redaccion ta spera cu e lo comunica cu DIARIO tocante e tema aki.
