Trabao boluntario ta uni comunidad durante preparacionnan pa Art Week Aruba

ORANJESTAD (AAN): Den cuadro di e preparacionnan pa Art Week Aruba, diferente boluntario local y internacional a

uni esfuerso pa contribui na embeyecimento di comunidad na San Nicolas. E iniciativa a trece hunto artista, fundacion, residentenan y bishitantenan cu boluntariamente a dedica nan tempo y energia na diferente actividad.

   Un di e participantenan, musico independiente Rocky Balboa, a splica cu durante un actividad di team building a surgi e iniciativa pa un grupo di mas cu 10 persona, mayoria di nan internacional, participa den verfmento di casnan den comunidad.

   Pa Balboa, e experiencia ta demonstra cu arte por bay mas leu cu expresion artistico solamente. E por crea conexion entre hende di diferente pais y cultura y, na mes momento, brinda un aporte concreto na e comunidad caminda nan ta bishita.

   E participacion ta forma parti di un esfuerso mas amplio cu durante e ultimo lunanan a conta tambe cu apoyo di boluntarionan local. Segun Geraldo Milton, consehero den Ministerio di Labor, Integracion y Energia, durante aproximadamente dos luna diferente persona a dedica nan tempo na e actividadnan di embeyecimento. Te awo, 14 cas a haya verf, algo cu segun e, a genera reaccion positivo entre e habitantenan.

   Milton a califica e iniciativa como un manera positivo pa stimula participacion den comunidad. Ademas di esnan cu ta verf, otro persona ta contribui brindando awa, cuminda y otro tipo di apoyo na e boluntarionan durante e trabao.

   E expectativa ta cu e dinamica aki por bay mas leu cu e actividad actual y stimula otro iniciativanan den futuro, caminda habitante y organizacionnan por sigui traha hunto na bienestar di nan comunidad.

Participacion di diferente comunidad

   Luisa Rincon Peterson, directora di Expresion Folklorica Viva Venezuela, tambe a destaca e importancia di participacion comunitario. E grupo folklorico, cu ta conta cu participantenan di Venezuela y Colombia, ta contribui boluntariamente na actividadnan di limpiesa y embeyecimento, particularmente na San Nicolas.

   Rincon Peterson a haci un yamada na otro fundacion y gruponan pa tambe acerca y participa. Segun e, personanan di diferente nacionalidad cu ta biba na Aruba ta forma parti di comunidad y por contribui activamente na cuido y embeyecimento di e isla.

   Durante su participacion, el a destaca tambe e presencia di Prome Minister Mike Eman den diferente actividad comunitario. Segun Rincon Peterson, e hecho cu e Prome Minister personalmente ta dedica tempo y energia na e trabaonan ta un ehempel cu por inspira otro hende pa participa.

   E participacion di tanto boluntarionan local como internacional ta refleha e caracter amplio cu e iniciativa a haya: hende di diferente nacionalidad y background, uni pa un meta comun.

   Mas cu solamente verf cas, e actividad ta crea oportunidad pa residente, artista, fundacionnan y boluntarionan conoce otro, traha hunto y fortalece e sentido di comunidad.

   Cu cada persona cu ta duna un man, e iniciativa ta contribui no solamente na un San Nicolas mas bunita, sino tambe na un comunidad mas uni y participativo.