Conocido Addonsito Croes tabata hurado pa Miss Teen Universe 2026

ORANJESTAD (AAN): A sali na cla awo, cu den fin di siman tabatin un certamen nobo na Aruba.

   E conocido Addonsito Croes a fungi como hurado, y el a manda un relato pa DIARIO.  El a splica cu den weekend e tabatin e honor y confianza di e organizacion campeon di Miss Teen Universe 2026, bao guia di Edgar Kock, pa forma parti di e cuerpo di hurado.

   “Un competencia rumbo e final  cu a start oficialmente dos anochi prome  caminda 8 hoben a presenta nan diseñonan den trahe di baño y gala dress. Tambe nan a tene entrevista individual cu e hurado.

E final mes den ballroom di Marriott Aruba Resort tabata un cu mi ta aplaudi e organizacion cu a traha duro bao guia di Edselyn Figaroa, Xavier y Jeanissa Maduro, Edgar Kock y demas miembro.”

   Tabata dificil pa saca e ganador cu ta representa Aruba otro luna na Phnom Penh, capital di Cambodja na Asia. Ocho candidata bon prepara a competi y cada un tabatin e chens di gana e corona cu diamante ros.  E produccion, e musica, maestronan di ceremonia, e trato pa cu hurado, cada reina, cada preparado, cada diseñador, cada fotografo, coleganan hurado, tur boluntario y miembro di produccion, sponsor y e forma cu e show a cana, tabata asina profesional cu mi ta bisa cu nos tabata honra di a ser pidi e responsabilidad aki.

   Pabien organizacion, pabien tur reina y pabien na e ganador Caithlyn Kock, su finalistanan y su famia y apoyadornan. Tambe tur cu a gana un premio special e anochi aki. Hopi exito na Miss Teen Universe Aruba 2026, Caithlyn Kock y cu Aruba logra e corona maximo aki.  Tambe exito cada candidata cu lo ta nos representando nos na otro certamennan rond mundo.