Setar ta orguyoso di contribui na Student Development Fund di Universidad di Aruba

Pa di 5 aña consecutivo

ORANJESTAD (AAN): E compania Setar NV tabata presente na Universidad di Aruba durante e ceremonia di Student Ambassador Award pa haci entrega di un check simbolico. E aña aki ta un ocasion special, unda cu SETAR ta contribui pa di cinco aña consecutivo cu 10.000 Florin na e Student Development Fund di Universidad di Aruba.

   Un fondo cu durante e añanan a wordo uza pa yuda studiantenan di Universidad di Aruba cu sosten financiero pa, entre otro, cubri costonan relata na estudio, vivienda of stage den exterior como tambe fondo pa bishita congreso of pa desaroyo di entrepreneurship.

   Pa SETAR, inverti den educacion ta un parti esencial di contribui na un Aruba mas fuerte y prepara pa futuro. Nos ta orguyoso di por apoya nos studiantenan den nan desaroyo academico y profesional, y di continua fortalece e partnership entre SETAR y Universidad di Aruba.