Tour Operators Uni a bishita Tera Cora hunto cu Minister Herdé y DNM

ORANJESTAD (AAN): Diahuebs 24 di september, representantenan di Tour Operators Uni a haya e oportunidad pa subi tereno hunto cu Minister di Infrastructura, drs. Rene Herdé,

y Director di Directie Natuur en Milieu (DNM), Sr. Gisbert Boekhoudt, pa mira e area di Tera Cora hunto. E reunion tabata un orientacion; no tabata un negociacion y no a tuma ningun decision tocante e ruta.

Den un orientacion anterior DNM a mustra un mapa cu e lugarnan unda, segun DNM, tin neishi di shoco. Riba tereno e grupo a constata un neishi den e area cu DNM a delinea. Segun medicion basa riba e registro GPS di e bishita, e neishi ta situa aproximadamente 375 meter for di e caminda di santo unda UTV, ATV y Jeep ta core, y aproximadamente 30 meter for di e heki di e veld di golf. Tour Operators Uni ta spera cu DNM lo comparti su documentacion y su mapa di neishi cu tur parti involucra.

"Nos ta satisfecho cu e paso positivo aki, unda DNM por a mustra y educa nos riba tereno mes tocante e zonanan fragil, e areanan di neishi y reproduccion, y e flora y fauna. Mientras tanto nos ta keda pendiente pa ricibi un copia di e documentacion mas reciente y e mapa di neishi di DNM," asina Tour Operators Uni a informa despues di e bishita na Tera Cora.

Tour Operators Uni a pidi pa Aruba Birdlife Conservation tambe participa den e bishita riba tereno, pa comparti su conocemento. E organisacion no a participa, y tampoco tabata presente na e reunionnan hunto cu e operadornan durante luna di september. Tour Operators Uni a manda un carta na Prome Minister y Minister di Infrastructura cu e peticion pa facilita un reunion cu Aruba Birdlife Conservation lo mas pronto posibel, pasobra ta importante cu tur partido ta forma parti di e combersacion y di e solucionnan pa futuro di turismo y naturalesa.