Comunidad invita pa “Ban Sigui Combersa di Musica na Aruba”

Recordatorio awe diasabra 26 di september:

ORANJESTAD (AAN): Comision Nacional di Patrimonio Cultural Intangibel Aruba ta recorda comunidad cu awe diasabra 26 di september lo tuma luga e di dos consulta comunitario “Ban Sigui Combersa di Musica na Aruba”, di 2:00 pa 4:30 di atardi, na Archivo Nacional Aruba, Sabana Blanco 60.

E encuentro ta continua cu e proceso inicia durante e prome consulta, unda participantenan a identifica diferente genero musical cu ta forma parti di patrimonio cultural di Aruba. Den e di dos consulta, lo profundisa den e generonan identifica, poniendo atencion na nan historia, caracteristica, instrumentonan, baile, vestuario, portadonan di tradicion y evolucion door di tempo.

Pa logra un imagen mas completo di e rikeza musical di Aruba, aporte di comunidad ta importante. P’esey, Comision ta invita musico, experto, organisacion cultural, investigador, portadonan di tradicion y tur persona cu tin conocemento, experiencia of interes den musica Arubiano pa participa y comparti nan informacion y memoria.

E informacion colecta durante e consultanan ta contribui na documentacion, proteccion y transmision di nos herencia musical na generacionnan futuro.

E proceso ta forma parti di e trabou relaciona cu implementacion di e Tratado di UNESCO di 2003 pa Salvaguardia di Patrimonio Cultural Intangibel. E actividad ta organisa den colaboracion cu Archivo Nacional Aruba, ArubaMusician.com, Biblioteca Nacional Aruba, Departamento di Cultura Aruba, Museo Arqueologico Nacional Aruba, UNESCO Aruba y UNOCA.

Fecha: Diasabra 26 di september 2026
Orario: 2:00 pa 4:30 di atardi
Luga: Archivo Nacional Aruba, Sabana Blanco 60

Comision Nacional di Patrimonio Cultural Intangibel Aruba ta invita comunidad pa participa, comparti su conocemento y contribui activamente na salvaguardia di nos herencia musical.

Nos musica ta parti di nos identidad. Ban sigui combersa, documenta y conserva e herencia aki hunto.