ORANJESTAD (AAN): ‘Mayra su regalo’ ta un buki di Lizette Winterdal cu ilustracion di Roman Gibbs.
Autora di buki pa mucha Lizette Winterdal a presenta su buki e siman aki na biblioteca y regala 5 ehemplar pa biblioteca su lesadornan hoben por conoce Mayra.
“Biento di december ta supla suave den e cayanan yen di holor di fiesta y speranza. Tur caminda bo ta mira luz di Pasco riba e casnan. Cantica di alegria ta yega for di tur skina. Famianan ta prepara pa un tempo magico. Pero den un bario yen di mucha, tabata tin un yiu cu su curason tabata tristo, pasobra e aña aki parse cu Pasco lo ta sin briyo, kerstboom y magia. Pero Mayra no tabata sa cu un encuentro inespera lo cambia su fiesta pa semper”. “Lizette tin pasion pa skirbi storianan, poema y versje. Hunto cu famia y conocinan por lesa su storianan y pasa leuk.”
Lizette Winterdal a nace dia 12 di april 1979 na Aruba y a lanta na San Nicolas. Su idiomanan materno ta Ingles y Papiamento. Lizette ta bin di un famia di 7 ruman muhe y e ta e ruman mas chikito. Banda di su trabao el a bay avondhavo San Nicolas y a logra su Havo diploma. Lizette su deseo ta pa bira docente y awe ta studia na e Instituto Pedagogico di Aruba (IPA). Lizette a tuma e decision pa cambia di estudio. E estudio actual cu e ta haci ta Bachelor Nederlands als Vreemde Taal. E ta gusta musica y baila. Su hobbynan ta: skirbi storia, poesia y rima. E ta bisa cu ora bo lesa un buki ta manera bo ta haya un pasashi gratis pa bishita lugarnan bunita. Bo ta conoce personahenan nobo.
Lizette tin 4 yiu. 1 yiu homber, Brandon y tres yiu muhe, Crystal, April y Gili. Esaki ta e di dos biaha cu Lizette ta participa den Festival di buki pa mucha y ta contento pa por conta storia pa e muchanan. Lesamento ta haci nos contento.
