Tin diescuatro agente nobo pa Wardacosta Caribe Hulandes

ORANJESTAD (AAN):  Despues di a finalisa cu exito un estudio di un aña, diabierna ultimo diescuatro aspirant a ricibi nan certificado y diploma di ‘Buitengewoon Agent van de Politie’ (BAVPOL),

for di man di Director di Wardacosta di Caribe Hulandes, Walter Hansen y Alpha Falbru, Directora di ‘Opleidingsinstituut Rechtshandhaving en Veiligheidszorg (ORV).

            E aspirantnan a ricibi e diploma y certificado durante un ceremonia na Marinebasis Parera. Awor e aspirantnan ta agente di Wardacosta completamente desaroya y establece y nan ta bay reforsa e basenan di Wardacosta na Corsow, Aruba y Sint Maarten.

            E aspirantnan aki a cuminsa cu e estudio Basico di Wardacosta, e ‘Basis Opleiding Kustwacht’ (BOK) na augustus 2022. Durante e cuater simannan despues nan a ricibi nan formacion. E asina yama periodo ‘Samen Sterk’ durante cual nan a keda di test tanto mental como fisicamente.

            Despues di e simannan di formacion a cuminsa e sobra di e formacion BOK y entre otro nan a ricibi lesnan basico di habilidad di tiro, habilidad nautico, habilidad di temanan di ley y proceso di embarcacion. E aspirantnan a haya bastante retonan fisico, mental y teoretico y awor ta cla pa proteha y yuda e comunidadnan.

            Durante e ceremonia tanto Director di Wardacosta, Walter Hansen como Alpha Falbru Directora di  ORV, a dirigi nan mes na e agentenan. Casi un aña e aspirant nobo nan a antisipa e dia aki. Despues di a lucha duru y pasa periodonan largu for di nan cas y famia, awor nan por celebra nan logro.

            E diplomanan a yega y awor e trabou na Wardacosta por cuminsa. E agentenan nobo dentro di poco ta bay e puntonan di sosten di Wardacosta na nan pais caminda hunto cu otro agente di Wardacosta nan lo bay traha riba lama.