Tin alrededor di 476 miyon indigena den mas di 5000 grupo diferente na 90 pais  

Ramon Todd Dandare a indica: 

*Tur e lenganan di e islanan di Caribe a disparce, cu excepcion di e lenga yama Carib na Dominica 

ORANJESTAD (AAN):   E pueblonan indigena ta representa un gran diversidad: tin alrededor di 476 miyon indigena den mas di 5000 grupo diferente na un 90 pais n'ey, cu ta papia un mayoria abrumador (mas di: 4000) di e mas o menos 7000 lenga di mundo, asina Linguista Ramon Todd Dandare a duna di conoce durante su charla ‘Lenga Indigena – Tradicion y Supervivencia’ cu a keda presenta na Biblioteca Nacional durante e conmemoracion di Dia Internacional di e Pueblonan Indigena.

E pueblonan aki ta forma mas o menos 6% di poblacion mundial; sinembargo, nan ta entre e poblacionnan mas desfaboreci y vulnerabel, representando por lo menos 19% porciento di e pueblonan mas pober na mundo.

E pueblonan indigena a hereda y ta practica cultura y forma unico di relaciona nan mes cu hende y cu medio ambiente. Ademas, nan a retene rasgo social, cultural, economico y politico cu ta o distinto di esunnan predominante den e sociedadnan unda nan ta biba. A pesar di nan diferencianan cultural, e pueblonan indigena di henter mundo ta comparti problema comun na mo proteha nan derechonan como pueblo diferente, Todd Dandare a indica. 

E PUEBLONAN INDIGENA Y NAN CARACTERISTICANAN

            E pueblonan indigena, conoci tambe como pueblo original, pueblo aborigen of pueblo nativo, ta e gruponan etnico cu ta e habitantenan original di un region determina na mundo, contrario na e gruponan cu a ocupa of a colonisa e region ey of a establece na e area ey mas recientemente.

Ta describi e gruponan como indigena, si nan a mantene tradicion of otro aspecto di e cultura original (primitivo) asocia na un region determina.

            No ta tur pueblo indigena ta cuadra cu e caracteristica aki, ya cu hopi di nan a adopta elemento substancial di un cultura colonisado, manera bistimento, religion of idioma.

            E pueblonan indigena por ta estableci den un region determina (esta, sedentario) of nan por tin un estilo di bida nomadico den un teritorio grandi, pero en general nan ta historicamente asocia cu un teritorio specifico di cua nan ta depende.

            Por haya sociedad indigena den tur zona climatico habita y na tur continente di mundo.           

SUR AMERICA y CARIBE

Linguista Ramon Todd Dandare a duna di conoce tambe cu un clasificacion di compromiso ta duna  un 40 famia linguistico y un cantidad importante  di lenga aisla na Sur America y Caribe continental. Tur e lenganan di e islanan di Caribe a disparce, cu excepcion di e lenga yama Carib na Dominica (cu en realidad ta un lenga Arawak).

El a agrega cu entre e famianan linguistico ta existi shete famia linguistico grandi di amplio distribucion na

Sur America y Caribe continental: famia Macro-Tupi, famia Arawak, macrofamia Macro-Ye, famia Caribe, famia Pano-Tacana, famia Chibcha y famia Tucano.

Pa loke ta cantidad di papiado e famianan importante of macrolenga forma pa un cantidad reduci di lenga, pero cu a alcansa gran difusion, ta: quechua, guaraní, aimará, mapuche (mapudungun) y wayuunaiki.

Pa haya un idea di e amplitud geografico di lenga indigena mas cerca di nos, lo mira ehempel

di distribucion di lenga indigena na Colombia y Venezuela. Pero, prome ta mira un subdivision di e lenganan Arawak v muestra di e grupo cu ta mas liga cu e islanan ABC. (WAK IMAGEN ADHUNTO).