President Edmar Lopez di e club di servicio
ORANJESTAD (AAN): Manera cu DIARIO a trece dilanti recien, e grupo local di coredornan di Harley y motorcycles, esta ‘Old Skool Bikers Club Aruba’ a lanza nan campaña nobo pa sigui cu e meta di duna yudansa na otronan. Nan ta haci esaki den cuadro di nan programa social cu yama ‘Helping The Helpers’.
President di Old Skool Bikers Club Aruba, esta John Tromp, a relata cu pa aña 2025 e grupo a dicidi na yuda dos organizacion social local e biaha aki, y a haya refuerzo di dos grupo mas di Bikers. Ta trata aki di HOG-297 y tambe Shoco Legend, y hunto e tres gruponan aki a uni forza pa yuda dos Service Club importante di Aruba. Ta trata di Aruba Lions Club, y tambe One Happy Island Lions Club, cu nan proyectonan social.
Pa por logra esaki, nan lo bay tene un rifa atrobe y e biaha aki prome premio ta un Harley Davidson modelo Fat Boy, cu ta un edicion di 120 aniversario. Harley a fabrica solamente 3.000 di e Fat Boy aki, y Aruba lo bay rifa esun cu tin serial #45. E rifa tin como 2ndo premio, 2.000 Florin, y 3er premio tin 1.000 Florin.
Durante e conferencia di prensa, e grupo a haci entrega di e prome bukinan di rifa. Pa Aruba Lions Club, esaki a wordo ricibi door di Edmar Lopez, kende ta president di e club di servicio.
Lopez na nomber di Aruba Lions Club, a gradici e tres grupo di Bikers cu nan a considera nan club di servicio pa participa den e campaña di recauda di fondo aki. Segun Edmar Lopez, tur ganashi lo bay bek 100% pa comunidad.
Aruba Lions Club ta envolvi tur aña den diferente proyecto pa yuda comunidad, y na Aruba nan ta haciendo esaki caba pa 78 aña consecutivo. Constantemente nan ta trahando riba proyecto, y semper ta yuda tur hende y tur necesidad.
Lopez tambe ta entusiasma pa e Kick-Start di e campaña aki pa dia 6 di September venidero. Nan tambe lo ta para na lugarnan strategico banda di caminda, cu nan jacket geel bisti pa bende e rifanan aki. Tambe lo bende nan durante actividadnan di nan proyecto.
E lider di Aruba Lions Club a indica cu e premio grandi di e rifa ta hopi atractivo. E ta indica ademas cu si acaso bo no a gana e premio, toch bo sa cu cumprando e rifa bo a yuda Aruba grandemente.
Si bo cumpra rifa di awor caba te cu 6 di September, tin chens pa participa den un tombola yena cu door prize durante nan programa di lanzamento cu lo tuma lugar e dia ey na Balashi Garden. Bay cu bo ticket of cumpra mas na Balashi Garden, y ricibi un ticket di tombola pa cada ticket di rifa cu bo cumpra. E anochi ey lo tin animacion musical di ‘N Fuzion, grupo Skale, y DJ Jeff pa anima publico.
Presente na e conferencia di prensa tabatin tambe Hilda, representante di Shoco Legend. Varios miembro di tanto e Bikernan y tambe e clubnan di Lions tambe tabata presente. Nan ta spera cu comunidad duna nan un sosten pa nan sigui yuda e clubnan social di Aruba.
