Romely Flanegin, directora:
ORANJESTAD (AAN)—Tienda di Educacion ta forma parti di e Proyecto Vision Pedagogico, y hunto cu otro instancianan manera Fundacion Pa Nos Muchanan e ta participando den e campaña pa muchanan ta safe den carnaval, enfocando riba edad di 0-5 aña.
Tienda di Educacion ta carga e campaña den tur forma, e ta parti flyer na scolnan, riba social media, y a yama diferente rueda di prensa pa trece nan puntonan dilanti.
Romely Flanegin, directora di Tienda di Educacion, su enfoke ta educa mayornan, educadornan, pa keda enfatiza riba nan puntonan, pa e carnaval keda safe pa tur mucha y hoben.
Un punto cu nan ta enfoca hopi riba dje ta esun di edad. Muchanan bao di cinco aña pa por fabor mayornan tene cuenta pa no hiba nan carnaval, evalua hopi bon si esaki ta na bienestar di e mucha, y otro parti ta na unda y cu ken ta laga e mucha. “Esaki ta un punto cu ta bin dilanti, pasobra e ta pasa cu tin muchanan ta keda so na cas, locual tampoco ta e idea. P’esey Fundacion pa Nos Muchanan a comparti un lista di crèche, traimerdianan, cu ta haciendo e parti di opvang pa e dianan di carnaval. “Y nos ta bisa mayornan tira un bista riba esaki. Si bo tin muchanan bao di cinco aña, tin alternativa unda por laga nan, si no tin un hende safe den famia unda por laga nan”, señora Flanegin a señala.
No obstante diferente persona y instancianan ta observando cu durante e paradanan tin presencia di mucha chikito. No tin un ley mara na dje ainda, y p’esey e ta wordo yama un campaña di concientiza pasobra nan kier pa e educador, e mayor mes evalua e puntonan di concientizacion y wak di berdad kico ta e beneficio y e riesgo ora mayor ta bay cu un mucha asina chikito na un parada.
“Fundacion pa Nos Muchanan tin un foyeto cu ta enfoca den muchanan di 0-5 aña y unda nan ta enfoca tambe riba e consecuencianan pa mucha den e edadnan aki, si ta hiba nan carnaval”, Romely Flanegin a duna di conoce.
El a agrega cu hopi scol y otro instancia social a sostene e campaña aki, door di share riba nan page, manda e flyer digital pa mayornan, hasta flyer geprint a bay cas pa e mayornan. “Pues nos por ripara cu e concientizacion ta hopi grandi, pero for di mayornan e accion tin cu bin. E mayor tin cu evalua e decision mirando e puntonan aki pa miho laga e chikito cu un adulto di confianza na cas, of wak un di e opcionnan di instancianan pa laga e mucha durante carnaval pa e ta safe”, Romely Flanegin, directora di Tienda di Educacion, a reitera.
Hunto cu e articulo aki por lesa riba flyer cual ta e puntonan di concientizacion di e campaña Mucha y Hoben Safe den Carnaval.
