ORANJETSAD (AAN): Colegio di Supervision Financiero Curacao y St. Maarten (Cft) a manda un mensahe cla y raspa e siman aki pa gobierno na Willemstad.
Nan ta bisa cu den combersacionnan recien cu Gobierno di Curaçao, Colegio di supervision financiero Curaçao y Sint Maarten (Cft) a insisti cu mester atende e problemanan cerca Servicio di Impuesto di Curaçao mas pronto posibel. Desde 2021, e ingresonan di impuesto ta mustra un aumento, entre otro pa motibo di e medidanan di compliance cu ta tuma desde e tempo ey. Sin embargo, tambe tin problemanan persistente. Un Servicio di Impuesto profesional y honesto ta di importancia crucial pa por mantene e resultadonan positivo.
Desde e dia cu el a asumi su cargo, na 2021, Minister di Finanzas di Curaçao ta traha riba mehoramento di e compliance tributario. Durante bishitanan na Servicio di Impuesto y Stichting Belastingaccountantsbureau, Cft a combersa tocante di e accionnan di mehora den e marco di e trayecto aki. A pesar cu a logra resultadonan positivo, mas profesionalisacion di Servicio di Impuesto ta necesario pa mantene y expande e resultadonan aki.
Reorganizacion Servicio di Impuesto: Na 2024, investigacion di Stichting Overheidsaccountantsbureau a demostra cu den e implementacion di legislacion tributario, tabata tin casonan di tratamento preferencial indebido di parti di Ontvanger. Ademas a constata cu no ta cumpliendo cu e marconan legal. Esaki ta afecta e confianza den Servicio di Impuesto, y ademas e ta trece riesgonan pa e moralidad tributario. Tin plannan avansa pa reorganiza y modernisa Servicio di Impuesto.
Cft a urgi Conseho di Ministro pa priorisa e reorganizacion aki mas tanto posibel, pasobra un Servicio di Impuesto honesto y transparente ta contribui na e salud financiero di Curaçao. Den e marco aki, Cft tambe a pidi atencion pa e reforma di e sistema tributario. Akinan tambe tin oportunidadnan pa mehora compliance, y di e manera ey, aumenta e ingresonan. Asina ta crea posibilidadnan pa por baha e presion tributario alto na Curaçao.
Presupuesto 2025: Curaçao ta presenta surplusnan presupuestario multianual, principalmente pa motibo di e aumento den e ingresonan di impuesto. E pais tambe ta haciendo progreso den e otorgamento di licencianan na proveedornan di weganan di azar online. Di e manera aki ta crea espacio pa implementa reformanan sumamente anticipa, por ehemplo den cuido y seguridad social.
E reformanan aki lo beneficia tur ciudadano di Curaçao. Den e marco aki, Cft tambe a pidi atencion pa e elaboracion mas detaya di e solucion pa e problematica financiero di Curaçao Medical Center.
