Tienda di Educacion contento cu mamanan hoben di ADRA a gradua

ORANJESTAD (AAN): Tienda di Educacion na Aruba, a expresa cu nan ta inmensamente contento di por a aporta positivamente na nos mamanan hoben di ADRA.

   Adventist Development and Relief Agency (ADRA) ta suministra yudansa y asistencia di desaroyo na hobennan.  Nan ta trahando pa hopi aña caba cu mamanan hoben, via un programa di life coaching, yama ‘From Teenage Parent to Life Coach’.

   Tienda di Educacion a splica cu pa nan, tabata un honor cu nan por a forma parti di e celebracion y ta testigo durante e graduacion di e mamanan hoben.   Hopi agradecido cu nan por a aporta na e proceso di nan crecemento durante e programa di ADRA door di brinda e mamanan tayernan pa empodera nan y engrandece nan conocemento y habilidadnan como mayor.

   Sigur Tienda di Educacion ta spera cu nan keda crece y practica cu tur locual nan a siña durante e tayernan. Finalmente lo kier recorda nan, cu semper nan lo por conta riba nos di Tienda di Educacion pa sosten den lantamento y criansa di nan yiu.