Tienda di Educacion a muda na un adres mas accesibel pa mayor, educadornan y partnernan

Romely Flanegin, directora:

ORANJESTAD (AAN) — E directora di Tienda di Educacion, señora Romely Flanegin, den entrevista cu DIARIO a indica cu nan ta hopi contento, mirando cu nan tin hopi innovacion reciente y nan por a celebra cu Tienda di Educacion tin su oficina nobo, cu ta mas accesibel pa mayornan y educadornan pa haya e ayudo necesario.

            Flanegin a expresa cu Tienda su enfoke ta keda mayor y educadornan pa duna nan e sosten den problemanan cu mayornan ta haya cu nan yiunan, di tur edad (0-18) y esey ta keda e meta principal di e institucion aki. El a bisa cu un bez cu nan ta sostene e mayor esaki ta bira na bienestar di e menor tambe, cu ta e meta principal di Tienda di Educacion.

            Actualmente, Tienda di Educacion ta situa na LG. Smith Boulevard 22, nan tin un borchi band’i caminda, cu ta hopi accesibel.

            “Naturalmente nos ta informando nos clientenan y tur partner, unda nos ta situa actualmente. Eigenlijk e ta mucho mas accesibel pa esnan cu ta traha cu Tienda tambe, pero mas tanto pa e mayornan p’asina nan yega mas facil, directamente, cerca nos”, señora Flanegin a menciona.

            E grupo cu mas ta acerca Tienda di Educacion ta e mayornan cu yiunan den edad di 14 pa 18 aña, cu ta esnan cu mas nan ta atendiendo, mirando cu tin diferente tendencia cerca e hobennan, manera vaping, presion di grupo, demotivacion pa bay scol, etc., y esaki ta e puntonan cu Tienda di Educacion ta haya recientemente, cu ta mas frecuente y cu nan ta purba di sostene mayor den esaki tambe.

            Encuanto presion di grupo, señora Flanegin a señala cu ta un cantidad di factor ta hunga un rol. Ta conoci cu hopi mayor ta traha oranan largo ainda, hasta ta traha dos trabao pa por mantene e cas financieramente. “Anto eynan bo ta haya cu e parti di crianza di e yiu ta wordo un poco neglisha y cu e muchanan ta busca atencion, amor, na otro caminda y tin biaha esaki no ta positivo”, directora di Tienda di Educacion a indica.