Coordinadora SVT, Jessy Ras:
ORANJESTAD (AAN): E proceso di seleccion di damas pa forma e grupo di SVT (Trayecto Formacion Social) grupo damas, a cuminza na Mariniers Kazerne, e siman aki. Nan lo cuminza cu e trayecto na Maart 2025.
Jessy Ras, coordinadora, den e lunanan aki y venidero nan tin cu pasa riba tur informacion di e hobennan cu kier participa.
Pa locual ta concerni e grupo #2 di 2024, Ras a bisa cu el a keda hopi contento con e dos gruponan cu a cuminza na Augustus ultimo a bay. “Na Augustus cu a pasa nos a caba di finaliza e grupo, nos a start cu 13 hoben y nos a finaliza cu siete. Mi ta super contento con el a bay, ta hobennan cu ya caba a haya trabao, y esey ta e parti bunita tambe cu nos por bisa cu nan a caba e trayecto no solamente cu cambio di caracter, comportacion y mentalidad, pero tambe cu nan ta logra haya un trabao, of ta dicidi bay scol bek, pasobra nan kier logra mas den bida, of nan kier drenta e opleiding militar”, Jessy Ras a señala.
Ras a subraya cu nan a haya un experiencia bunita durante e trayecto y unico na Kazerne, pero tambe nan a logra di bay Curacao y comparti cu e grupo di Curacao tambe. “Nos tin hoben tambe ta purbando den e opleiding militar, cu ta tuma lugar na Curacao. Ohala e por logra p’asina tambe nos tin un hoben militar no solamente di SVT pero ademas Arubiano, cu ta logra bira un militar”, Ras a reitera.
El a duna di conoce cu na edad di 16 aña e hoben por cuminza haci e trayecto di inscripcion caba, pero ta haci necesario cu pa dia 4 di Maart, e mester a cumpli 17.
Ras a menciona cu awo ta bin un periodo basta druk, tin eleccion tambe na December, ta bin carnaval, y tin ora e hobennan ta warda un tiki, prome cu bin inscribi na SVT. Por ta ainda nan no ta sigur di kico nan kier haci. “Mi kier bisa e hobennan bin inscribi, e no ta mara na nada, importante ta cu bo ta inscribi y por cuminza cu e actividadnan, pasobra si bo kier haci e trayecto y bo ta bin final di Februari ya caba e ta laat, pasobra e ta dura prome cu bo haya e test medico, y pa nos haci e sport test tambe. Bin inscribi y ainda na final bo por dicidi su bo kier keda den e grupo of no”, Jessy Ras, Coordinadora di SVT a señala.
