Na October a nace 81 baby
ORANJESTAD (AAN): Den cuadro di transparencia y informacion nos di Horacio Oduber Hospital (HOH) ta comparti cu boso e cifranan pa loke ta luna di october 2024. Como Hospital ta importante y alabes interesante pa duna comunidad di Aruba un indicacion di cuanto pashent Hospital ta atende mensualmente, cuanto operacion ta tuma luga, cuanto pashent a ser admiti via departamento di emergencia y mas.
Na luna di october a admiti 878 pashent cu ta un tiki mas halto cu na luna di september (860 pashent). Di e pashentnan admiti na HOH, 501 pashent tabata hende muhe y solamente 30,8% di e admisionnan tabata planea. E promedio di duracion admiti na HOH na luna di october tabata 4,3 dia. Na october ocupacion di cama a baha pa 83,5% compara cu luna di september (87,8%). Den nos sala di operacion a tuma luga no menos di 599 operacion.
Departamento di Emergencia a atende na luna di october 2686 pashent di cual 38,7% di pashent no tabata rekeri cuido di emergencia sino cuido di dokter di cas.
A nace na luna di october 45 baby mucha muhe y 36 baby mucha homber (total 81 baby). Y na oktober Bloedbank Aruba a ricibi un total di 188 donacion di sanger.
Specialistanan den servicio di Hospital a haci un total di 7895 consulta cu pashent na october, cu ta 421 consulta mas cu na luna di september. Departamento di radiologia a haci un total di 4333 test manera CT scan, MRI, echo y mas.
Un total di 14790 persona a bishita LABHOH na luna di october pa haci nan test diagnostico. Y na luna di october un total di 868 pashent a sali for di Hospital y regresa nan cas.
Hospital ta gradici tur 1200 empleado pa nan esfuerso continuo y ta recorda comunidad cu den cualkier momento no lubida cu cada uno di nos na HOH semper t’ey!
