Thessaly Zimmerman corona como Miss Universe Aruba 2021

Miss Universe lo ta na December na Israel -ORANJESTAD (AAN): Diabierna anochi, a toca honor pa Prome Ministro demisionario Evelyn Wever-Croes instala e simpatica dama Thessaly Zimmerman como Miss Universe Aruba 2021.

  Despues di esey, e reina saliente Helen Hernandez a pasa e corona pa asina Prome Ministro a pone riba cabez di Thessaly.

   Esaki a tuma lugar na Enchanted Garden na House of Mosaic, durante un actividad organiza pa Star Promotion, cu keto bay tin e franquicia di Miss Universe pa Aruba.

   Thessaly pues ta prepara awor pa e certamen di Miss Universe 2022, cu segun national director di Star Promotion Anoutcka Koolman-Burleson, lo tuma lugar ya na December caba na Israel e biaha aki.

   Susanita Diaz-Maduro di Star Promotion, a indica cu debi cu e momento ta corto y pa manda e candidata di Aruba na December venidero caba, a opta pa no organiza un certamen pa eligi.  Pero nan a haci esaki cu e sistema di Casting, unda a haya un total di 5 candidata cu a pasa den screening y entrevista.

   Star Promotion lo no menciona nomber di e otro candidatanan, como cu nan ta hopi fuerte y nan deseo ta pa otro aña nan bolbe participa den e certamen como cu e chens pa nan ta hopi grandi.

   Un aplauso grandi a keda resona ora cu a anuncia cu Thessaly Zimmerman ta bira e representante di Aruba cu ta carga e corona.  Lectornan di DIARIO por corda cu na aña 2012, Thessaly a gana e certamen di Miss Teen Aruba International, y a hasta representa Aruba na e certamen Miss Teen Americas, unda el a bira e Vi-Reina de las Americas 2013.

   Thessaly a nace na 1994 bao signo di Virgo, e tin un grado den International Communications and Media, ta gusta viaha, hopi social y hopi positivo, bon disciplina, y ta buscando su metanan.  Y un di su metanan di mas grandi den bida, a wordo logra ora el a haya su corona riba cabez.

   E ta un mucha muher cu estatura hopi notable, cu un sonrisa constante.  Su mama y tata, hunto cu su rumannan tabata feliz e anochi aki.

   Thessaly a hiba palabra tambe, y na forma emocional a bisa cu e tabata warda pa e momento aki pa 9 aña caba, desde cu el a competi pa Miss Teen Aruba International, pues e ta un gran soño di dje pa hopi tempo caba pa representa Aruba na e certamen di Miss Universe.

   El a bisa cu e ta super emociona y tambe hopi contento.

   Thessaly a bisa ta preparando hopi duro caba, ta haciendo entrenamento constante, y e tin un ‘meal-plan’ hopi dificil tambe pa e cumpli cune, pero tur esey ta bayendo bon cu yudanza di tur amigo y famia.  E ta gradici tur esanan den su team.

   Fuera di esey e ta trahando riba algun proyecto tambe pa promove y papia di nan.  E ta purba di envolvi su mes den hopi asunto mas, y eleva nomber di Aruba na halto.

   Kico su opinion ta encuanto certamen di beyeza?  Thessaly a splica cu esaki ta un plataforma di beyeza, pero corda cu e no ta djis esey so.  Hopi di e candidatanan ta inteligente y nan kier demostra esey.  Nan tin capacidad di haci hopi mas cu djis di ta bunita, subi un escenario y smile.  Hopi Miss ta usa nan plataforma pa trece un mensahe dilanti tambe!

  E anochi a conta cu entretenimento cu cantamento di Rocco, y tambe DJ Nutzbeatz.