Esun actual ta data di 1959 - ORANJESTAD(AAN): Recientemente Formador Evelyn Wever Croes hunto cu otro miembronan di e coalicion di Gobierno a sinta cu mas stakeholder, incluyendo Ordo di Abogado.
Durante un conferencia di prensa despues di e reunion, Dirk Ormel, Deken di Ordo di Abogado a splica cu e Ordo ta consisti di alrededor di 90 miembro, di cual tur ta abogado na Aruba.
“E meta di e Ordo ta entre otro pa promove interes di e abogadonan, percura pa e servicio duna door di e abogadonan ta di calidad, percura pa calidad y aplicacion di ley door di tur actor concerni y percura pa derechonan humano wordo respeta na Aruba”, segun Ormel.
E abogado a indica cu e reunion cu Formador tabata uno bon y constructivo.
El a splica cu e Ordo di abogado a trece dilanti diferente punto di cual nan ta convenci cu nan merece atencion di e gabinete nobo.
“E puntonan treci dilanti awe ta relaciona cu e metanan di nos organizacion”.
Nos a haci y nos a contesta diferente pregunta y nos ta confia cu e gabinete nobo lo tene cuenta cu nos puntonan, segun Ormel, kende a bisa cu e Ordo ta gradici Formador pa e invita y scucha nan.
Pa loke ta e puntonan treci dilanti, Ormel a indica cu 4 punto specifico a wordo trata, di cual un di nan ta introduccion di un landsverordening nobo pa abogado, mirando cu esun cu tin actual ta data di 1959.
Segun Ormel e landsverordening ey ta bieu y ta basa riba tempo cu tabata tin menos cu 10 abogado na Aruba.
“Mientrastanto aruba tin alrededor di 115 abogado y a bira tempo pa Aruba haya un landsverordening moderniza pa abogadonan”, segun Ormel, kende a splica cu un concepto pa un landsverordening ta cla for di basta tempo caba.
Pesey el a pidi Formador pa duna atencion ta esey y pa percura pa e landsverordening nobo wordo introduci mas pronto posibel.
