The Freezone Gang a bira ganador di ‘vijfkamp’ di Centro di Bario Noord

ORANJESTAD (AAN): Recientemente na Centro di Bario Noord cu hopi entusiasma a tene un actividad di ‘vijfkamp’ cu a start for di un Diasabra pa 6’or di atardi y a finalisa te cu 12’or di mey anochi.

   E tabata un anochi di competencia den e disciplinanan di Ping Pong, Futbol di Sala (conoci como Futsal), tambe mini SesoSport, Karaoke, y Competencia di Baile.

   Como cu Centro di Bario Noord mes no tin team pa e 2 disciplina di Ping Pong y Futsal, a pone nan pa asina por lanta interes pa asina nos por logra den futuro haya un team pa e dos deportenan ey mescos cu nos tin actualmente pa Volley, Baseball y Domino.

   E organisadornan ta hopi agradecido na e teamnan cu a yega Centro di Bario y participa.

   E team ganador a bira The Freezone Gang.  Como ganador maximo, nan a bay cas cu e premio di The Old Cunuco House.  Na di 2 lugar a keda The Brains cu a bay cu premio di The Movies.

   Un gradicimento ta bay na tur participante, na e referee Osmani di Futsal, na referee Wernet di Ping Pong, na Jufr Glenda Croes Tromp cu a traha e preguntanan pa e mini SesoSport.  Tambe na e anfitrion talentoso Neilan Gomez, y tambe na CEDE Aruba.

   Centro di Bario Noord ta corda pueblo, cu nan Speeltuin full renoba, y e patio pa hunga Volleyball y Basketball ta habri di Dialuna pa Diabierna, tur atardi for di 4:30 pm te cu 7:30 pm.