Temporada di horcan por ta comienso di menasa pa salud publico

Advertencia di DVG

ORANJESTAD (AAN): Tur aña di nobo Aruba y demas Islanan den Caribe ta drenta temporada di horcan cuminsando 1 di Juni y terminando 30 di November. Ta conoci cu e temporada aki ta trece cu ne yobida local cu pa nos flora y fauna ta un bendicion pero tambe por ta inicio di un menasa pa salud publico si como poblacion nos no ta conciente y traha hunto pa minimalisa e riesgo di malesanan transmiti pa sangura.

   Manera ta conoci, sangura mester di awa pa por buta su webonan. Mas awa keda para rond di cas despues di yobida, mas oportunidad e sangura tin pa broei dentro di 8-10 dia. Pa nos por minimalisa e risico cu Aruba por bay experiencia brote di malesa transmiti pa sangura manera e.o Dengue, ta importante pa nos tur hunto ataca e problematica for di su raiz. Esaki ta encera reduci of stop e sangura di sigui broei na cantidad grandi.

   Esaki nos por haci door di: (*) Tira afo of warda tur obheto cu por retene awa innecesariamente paden y rond di cas, scol, trabou y alrededor di bo. Por ehempel scoter bou mata, tire, coy hunga pafo, vas cu mata of flor y mas.  (*) Tapa tur awa para cu tin proposito manera e.o pa muha mata of duna bestia. Por ehempel hemchi bou airco of bari cu awa di yobida y mas.  (*) Ta extra alerta riba awa para cu proposito di bida pa mata of mascota por ehempel vas cu mata of flor, baki awa di bestia, vijver cu mata di lili y mas.

   Di dos paso ta proteha bo mes pa bo no haya Dengue, esaki bo por haci door di: (*) Bisti paña cu manga y pia largo durante oranan di atardi pa anochi. (*) Uza repelente contra sangura riba cuero cu no ta cubri cu paña.  (*) Den espacio pafo di cas cende un mecha of uza bela contra sangura.  (*) Cera porta y bentana di cas prome cu bira scur of uza screen.  (*) Evita di bishita areanan unda bo ta conciente cu tin hopi sangura.  (*) Spuit paden di cas, camber, oficina y areanan cu bo ta frecuenta regularmente cu producto pa mata sangura.

   Di tres paso ta proteha otronan rond di bo ora cu bo tin Dengue of tin sintomanan di Dengue. Esaki bo ta haci door di evita di wordo pica pa sangura. E sintomanan di Dengue ta entre otro: (*) Keintura. (*) Dolor di cabes. (*) Biramento di stoma y sacamento. (*) Dolor di weso, joins y musculo. (*) Dolor di wowo. (*) Rash riba curpa.

   Si bo ta presenta e sintomanan aki, consulta bo docter di cas pa haci test y pa conseho riba e miho forma di tratamento.