Ata otro area grandi di Stof di Sahara riba Atlantico ta moviendo pa Caribe

Rodney Tromp di DMA

ORANJESTAD (AAN): Den fin di siman cu a pasa, ciudadanonan na Aruba por a nota cu e biaha aki un biaha mas e “neblina” visibel den dia, cu ta ponebo casi sin mira Hooiberg, ta en realidad e efectonan modera cu e Stof di Sahara den atmosfera ta produci riba Aruba.

   Loke por a nota y experiencia den fin di siman, ta en realidad e di dos biaha e aña aki cu pueblo di Aruba por a sinti e efecto di efecto modera di e Stof di Sahara cu ta extra diki den cielo.

   E prome biaha tabata siman pasa Diahuebs!  Y awor den fin di siman el a bolbe ripiti, y a sigui riba Dialuna y awe Diamars ainda lo por sinti e efecto diki di e Stof aki cu a cruza Oceano y yega te aki banda.

   Rodney Tromp di Departamento Meteorologico di Aruba, a indica cu riba e imagen di satelite aki por mira cu tin un area gigantesco di Stof di Sahara ta plamando ribacentro  Oceano Atlantico, y e ta stretch y yega te casi den Caribe bayendo direccion pabao.  Pues e area aki di stof riba Atlantico, pa Diaranson y Diahuebs e lo ta drentando den zona aki di Caribe.

   Stof di Sahara den atmosfera aki banda no ta abnormal, segun Tromp a enfatiza.  E capa di Stof di Sahara por bira abnormal ora cu distancia di visibilidad baha bao di 5.000 meter.  Te cu awor, e Stof cu bo ta mira ta limitando visibilidad na 9.000 meter, pues esaki ta cay den categoria ‘modera’.

   Loke ‘modera’ nifica ta cu el a reduci visibilidad, y ta crea problema pa esnan cu tin dificultad cu nan sistema respiratorio, incluyendo esnan cu ta sufri di asthma, problema di hala rosea, y ta sinti hopi picamento di wowo, nanishi ta kishiki un tiki.

   Awacero por trece alivio:  Imagennan capta riba satelite ta confirma cu e biaha aki e nivel di Stof cu ta afectando Aruba, ta mas concentra riba un area mas grandi.  Toch tin aire humedo presente den atmosfera na diferente nivel, y den cierto sentido e ta yuda reduci efecto di tormentanan, y di otro banda e ta reduci e concentracion di Stof.  Pues nubia cu awacero por baha e concentracion di Stof di Sahara.

   Pa awor DMA lo emiti advertencia severo pa Stof di Sahara, solamente si e visibilidad baha bao di 5.000 meter.  Pues e lo djis keda presenta como parti di e pronostico di 24 ora di Departamento Meteorologico di Aruba.

   Stof di Sahara no ta ocasiona realmente problema pa ekipo y motornan di avion, djis e visibilidad pa pilotonan lo bira menos.  No confundi esaki cu Stof di Shinishi cu ta sali di un erupcion di volcan.  Esey si ta hopi mas diki y lo afecta, paga, of hasta daña motor y windshield di avionnan.

   Pa awor, esnan cu ta sufri di malesa respiratorio, miho keda paden di cas den e dianan aki cu e concentracion di Stof di Sahara ta basta modera riba Aruba.