Bon noticia for di Republica Dominicana
ORANJESTAD (AAN): Den cuadro di e vision y compromiso di Minister di Finansa, Asunto Economico y Sector Primario, mr. Geoffrey Wever, pa estrecha lasonan comercial strategico cu paisnan den region cu e meta pa baha e costo di bida na Aruba, diaranson cu a pasa un delegacion comercial consistiendo di 30 empresario a sali rumbo pa Santo Domingo, Republica Dominicana pa atende e conferencia di Agroalimentaria 2025.
E bishita di e 30 empresarionan di Aruba na Agroalimentaria 2025 ta forma parti di e proceso pa desaroya y fortifica e sector primario cu e meta pa haci Aruba menos dependiente di importacion di alimento.
Cu e participacion na Agroalimentaria 2025 nos ta duna nos empresarionan acceso na exportadornan di producto di alimentacion di Santo Domingo y facilita e hacimento di negoshi den un otro pais. E meta ta pa nos haya acceso na productonan di fruta y berdura na prijs mas economico y den otro mercado, pa reduci nos dependencia di un of dos mercado so, segun Minister Geoffrey Wever.
Aruba a ricibi e bon noticia cu Don Andres, un compania den logistica den Caribe, ta anuncia un desaroyo nobo den su servicio di transporte pa Aruba. Cu e apertura recien y operacionando ya pa dos luna di facilidadnan moderno di almacenamento, awor Don Andres ta ofrece un mihor solucion pa clientenan cu ta busca un manera eficiente y rendabel pa consolida container for di Republica Dominicana.
E capacidad nobo aki ta duna negoshinan na Aruba e oportunidad pa mehora nan logistica di envio, cu un maneho di inventario mas eficaz, un tempo di entrega mas rapido y un reduccion den gastonan di transporte. Door di consolida e mercancia den e almacennan di Don Andres, clientenan por optimisa nan “supply chain” y probecha di solucionnan di envio adapta na nan necesidad specifico.
Minister Wever ta gradici e 30 empresarionan di Aruba, y Departamento di Asuntonan Economico di Aruba pa nan tremendo trabao ehecuta na Republica Dominicana durante e dianan di e feria.
