Team di Italia a manda busca hoben for di Aruba pa reforza nan ekipo

Andrey Bryson ya caba a viaha pa Italia

ORANJESTAD (AAN): E pueblo di Borgo Val di Taro na Italia, esta e team ‘Valtarese Basket’, a haya un refuerso grandi den nan team di Division Dos, door di firma un basketbolista hoben procedente di Aruba.

   Ta trata aki di Andrey Bryson, un hoben di apenas 18 aña cu for di chikito tabata adora y hunga Basketball ki ora cu e tabata por.  El a hunga algun tempo pasa un wega te na Curaçao, y tambe despues na St. Maarten.

   Despues di esey ta ora cu diripiente tur cos a cuminza pone su mundo bolter, pasobra te for di Italia e team aki a bin busk’e na Aruba pa e haci e viahe largo y hunga pa reforza nan team.

   Di e forma ey, a firma contract, y Andrey Bryson a haci e viahe largo cu e team mes a paga pe, y na Italia nan a dune un cas cu tin su mesun piscina, y tambe un auto pa e core pe.  Ademas di page un salario atractivo, nan mes ta sigui suministre cu comestibles y mas na e pueblo di Borgotaro.

   E team di Valtarese no a djis busca e basketbolista di Aruba so, ya cu nan a busca un otro hungador mas di Italia tambe pa reforza e team.

   Apesar di su edad hoben, toch Andrey Bryson a obtene hopi experiencia door di participa den varios seleccion di Aruba y tin experencia internacional como tambe a hunga algun wega na Hulanda. Na 2022, Andre Bryson a hunga den e NBA Pro Combine na Las Vegas durante e NBA Summer League.

Danki na ex-coach Italiano Antonio D’Albero cu un tempo a dirigi seleccion di Aruba, Bryson a bini den contacto cu e ekipo Valtarese Basket aki.

   Coach D’Albero conoce Bryson como persona y basketbolista. Pa Andrey Bryson esaki sin duda ta un oportunidad unico pa hunga basketball den exterior, den e caso aki na Italia caminda e lo por habri caminda pa otro hungadornan cu tin e mesun deseo cune.

   Su famoso tata:  Andrey Bryson a resulta di ta yiu homber di e conocido Raul Bryson, conoci na Aruba como “Mr. VIP”.  El a confirma esaki den un entrevista cu DIARIO, y el a splica cu e ta sinti su mes masha orguyoso mes cu su yiu ta haciendo su best na Italia, y tambe haciendo su best pa promove isla di Aruba aya abao.

  El a splica cu e mes, hunto cu su rumannan Rignald Bryson, Rensel Bryson, y Sonaida Bryson ta orguyoso di nan sobrino.  Claro cu Mr. VIP su otro 15 yiunan tambe a keda hopi contento pa sa cu un miembro di nan famia a bira un atleta internacional awor te na Italia.

   El a splica cu na momento cu e team a acerca su yiu pa participa, el a escoge pa bay Italia (danki na su paspoort hulandes) pa check su mes riba cancha internacional.  Y ya caba desde final di Augustus e ta demostrando cu training t abon, y cu e coach actual di Valtarese, esta Giordano Picelli tabatin mester pa yuda e team.

   Segun Valtarese, e firmamento cu e atleta di Aruba, ta algo cu nan a haci pa prome biaha, pero e lo no ta e ultimo, pasobra coach Picelli tin gana di busca mas yudanza asina pa asina ta mihor prepara pa siguiente campeonato cu ta na caminda.

   Mientras tanto, Mr. VIP a indica cu e ta haci tur dia oracion, hunto cu su yiunan morocho, y tambe su casa Delcy, pa asina Andrey Bryson haya proteccion y iluminacion completo di Todopoderoso pa e sigui haci su best, pa e haci henter Aruba orguyoso di su logronan.  E ta felicita hasta e pareha di Andrey, kende mientras tanto a keda Aruba pero cu a dune un sunchi masha largo mes na momento di despedida na Aeropuerto Internacional Reina Beatrix.  Mr. VIP a finalizando: “All the best my son, make us proud”.