ORANJESTAD (AAN): Manera ta conoci, e sorteo di Diabierna anochi pa cu Mini Mega a produci un solo ganador cu tabatin tur number bon, esta 13, 21, 22, 25, cu megaball 14.
Dialuna mes e ganador Rodney a presenta na oficina di Lotto na Playa, unda cu e funcionarionan a check su ticket pa mira si el a pone su firma parti patras, hunto cu e numbernan di banco.
Ora cu a scan e barcode den e computer, mesora esaki a confirma cu Rodney ta ganador di e 430.000 Florin di Mini Mega, hunto cu e 180.000 Florin di Mega Plus. Hunto esey a yega un total di 610.000 Florin.
Mesora a start e proceso pa transferi e premio electronicamente pa su cuenta di banco. Rodney a indica cu e ticket di e jackpot ganador aki el a cumpra na Tele Uno 3.
