ORANJESTAD (AAN) — Edward Maduro, lider di Sindicato SADA, den entrevista cu DIARIO a aplica cu ta normal cu un director of un hefe ta yama un trahado pa un combersacion,
pero mirando cu den e caso aki nan ta den un conflicto, pa motibo cu, manera a sosode den pasado caba, e sindicato ta manda carta ora cu tin un desacuerdo na pia di trabao y no ta keda cla cu e hefe di seccion, hopi biaha ta yama e director aden como intermediario, pa scucha e trahadornan kico ta nan keho of e problema cu nan ta bibando cune, pa asina wak si por yega na un solucion.
Loke a pasa te dia cu e trahadornan a manda carta, dia 23 di Augustus, no ta nada straño, ta algo normal. Locual ta straño y lamentable ta cu no ta duna oido na esaki. Ora cu bo duna e stap over pa bay den accion ya caba bo por bisa cu bo ta den conflicto cu bo director, bo hefe, of bo dunador di trabao.
Si bo kier scucha e trahadornan individual bo tin cu duna nan oportunidad di bin cu un auditor, y den e caso aki ta indica cu nan kier bay cu e sindicato como un 'toehoorder', pasobra nos tur sa y tur hende conoce e director aki y su manera di trata di intimida hende.
Aworaki SADA ta na spera di un reunion cu Minister di Finanzas pa por splike e situacion pasobra si nan no por keda cla cu e director nan tin cu bay un stap mas ariba y den e caso aki, nan a acerca e minister pa un reunion.
