Tayer di WTO GPA a resalta con por amplia e acceso di hende muhe empresario na Destaho Publico

ORANJESTAD (AAN):  E Comision di Compra Gubernamental di WTO (Committee on Government Procurement, CGP) a tene un tayer pa comparti informacion,

“Women Entrepreneurs and Government Procurement: Lessons Learned” na sede di WTO na Ginebra cu participacion hibrido via Zoom.

   Destaho publico ta representa un parti esencial di actividad economico rond mundo y ta conta cu 10–15% di GDP den paisnan desaroya y te cu 40% den paisnan den desaroyo. No obstante, solamente 1% di negoshinan dirigi pa hende muhe ta participa na contractnan di compra gubernamental, hopi biaha pa motibonan manera rekisitonan administrativo complica y acceso limita na oportunidadnan. E tayer a mustra cu ehempelnan practico con otro miembronan di WTO GPA a aumenta participacion di negoshinan dirigi pa hende muhe.

   E tayer a habri cu palabranan di Geoffrey Wever, Minister di Finansa, Asunto Economico y Sector Primario (via video) y e sesion a worde modera pa S.E. Audrey Goosen, Embahador di Reino Hulandes na WTO na Ginebra. E oradornan prominente a inclui Dr. Judith Fessehaie, Head, SheTrades Initiative, International Trade Centre, sr. Bongki Shin, Deputy Director, International Cooperation Division, Public Procurement Service of Korea, señora Vanesa Aventin Fontana, Deputy General Director of Governance and Coordination of Public Procurement, Ministry of Finance and Public Administration Spain,  señora Helena Morais Maceira, Researcher on Gender Mainstreaming at the European Institute for Gender Equality (EIGE), y Professor Anna Maria La Chimia Chiggai, Full Professor, School of Law, University of Nottingham, United Kingdom

   E oradornan a comparti nan experencia y instrumentonan riba con por: (*) Probecha di oportunidadnan y haya acceso na mercadonan stranhero pa saca probecho di e oportunidadnan manera inteligencia di mercado, informacion y coaching enfoca riba exportacion. (*) Beneficia di oportunidadnan di sub-contractnan cu ta resulta di contractnan di companianan multinacional. (*) Garantisa un diseño di destaho publico amical pa hende muhe empresario den procedemento di contractnan gubernamental cubri pa GPA.

  E tayer pa comparti informacion aki ta forma parti di e reunionnan di CGP y ta diseña pa duna conocemento mas profundo y enfoca riba contractnan gubernamental sensitivo na e genero femenino, pa inspira mas accion entre e miembronan di GPA y pa comparti e lesnan siña di tanto e economianan desaroya como e economianan den desaroyo.

   “Nos ta gradici cu Aruba por contribui na e dialogo global pa promove participacion igual den destaho publico. Si nos kier logra un economia realmente inclusivo y sostenibel, nos mester crea condicionnan cu duna hende muhe empresario mesun oportunidad pa participa y crece. E experencia di otro paisnan ta mustra claramente cu cu liderato, transparencia y apoyo tecnico, nos por amplia significativamente e acceso di hende muhe na destaho publico,” Minister Geoffrey Wever a expresa.

   E participacion di Aruba den e tayer di WTO GPA ta alinea directamente cu e meta di Gobierno di Aruba, manera acorda den e Programa di Gobernacion AVP-Futuro 2025–2028, pa promove igualdad di oportunidad, empoderamento economico y participacion activo di hende muhe den tur sector di nos economia. E iniciativa aki ta reforsa e compromiso di Minister di Finansa, Asunto Economico y Sector Primario pa crea un sistema di destaho publico mas accesibel, transparente y igual, cu ta contribui na un economia mas fuerte, diversifica y sostenibel pa futuro di Aruba.