Conocido Addonsito Croes hopi impresiona cu les y presentacion teatral na Aruba

ORANJESTAD (AAN): E siman cu a pasa, e conocido MC di Aruba, esta Addonsito Croes,

a bishita e presentacion di e actornan Arubano cu a sigui e workshop di con pa educa cu teatro y con pa hinca un obra di teatro den otro.

   E workshopnan aki tabata presenta pa docentenan teatral for di St. Maarten, Aruba, Bonaire, Curaçao, Hulanda y Surnam.

   Un total di 18 actor a presenta tres obra cortico na e publico grandi cu a presenta. Cada actor a ricibi nan certificado di participacion.

   E tres obranan presenta tabata: “Daisy”, dedica na e señora di nos heroe nacional Padu Lampe.  Tambe “Suspiro di un Muhe”, dedica na e labor fuerte cu e hende muhe Arubano ta hiba den e ciclo di su bida.  Tambe “E miho receta di Aruba”, dedica na e  receta mas tipico di Aruba su cuminda Pan Bati. Paz, energia y amor ta parti importante di e receta.

   “Loke cu mas a acapara mi atencion ta e forma disciplina con cada actor a presenta nan obra. Teatro por ta haci na cada luga y no mester ta mara na un sala luhoso den cua prijsnan ta extremadamente halto. E escenario tabata e biaha aki e tereno amplio di Colegio Arubano.”

   Pabien cada actor y maestro sin lubida maestro Amy Lasten y  Cultuurfonds, CEDE Aruba y Unoca p’e sosten enorme. Teatro Arubano tin cu keda existi pa hopi aña mas y ta keda na cada un di nos pa keda stimul’e y inculca su amor den nos futuro generacion. E ta un arte mucho bunita y unico pa nos lag’e bay perdi.  Pronto tur Arubiano interesa den e arte aki lo tende masha bon noticia tocante di un master opleiding cu lo ta ofreci door di Amsterdam Hogeschool voor de Kunsten.