Director di Setar NV a splica:
ORANJESTAD (AAN)—SETAR NV, a yama un conferencia di prensa, en conexion cu SETAR su Digital Week, cu ta tumando lugar for di dia 20 te cu 24 di October awo, na e Oficina Principal na Seroe Blanco.
E SETAR Digital Week ta un oportunidad pa profundiza den e mundo digital. Director, señor Roland Croes a señala cu nan mes cu ta den e negoshi aki ta keda asombra tin ora, na e rapidez con e mundo digital ta avanza y cambia.
El a haci un repaso riba e tempo di pandemia, y a bisa cu hopi hende no a realiza cu e Covid-19 a causa mas cu problemanan di salud.
“Despues di pandemia y durante e pandemia, cosnan cu normalmente a tarda añanan pa tuma lugar, a sosode. Mi ta corda cu den un par di siman, den e pandemia, diripiente nos a haya un producto manera zoom, y con esaki a bin. Por ta bo no ta realiza, pero prome cu esey cuanto di nos tabata tin un meeting riba zoom? Kico a pasa ora cu paisnan nan frontera a cera, mester a hinca formulanan nobo, con pa comunica cu otro. Pasobra negoshinan mester sigui, economia mester sigui, e ora ey e tipo di productonan aki a bin acerca.
Pero el a cambia habito tambe, pasobra banda di esey, ora bo ta na cas bo ta bira creativo den un otro forma. Bo kier relaha tambe. E ora ey bo ta wak servicionan ta cuminza riba platform. Platform ta un punto central unda tur hende ta bay haci uso por nada. Cuanto hende no a bira adicto na Netflix durante e periodo ey? Wak television.
Kico bo haci na cas? E ora ey wak television, come pop corn, subi di peso…bo por bisa cada atardi”, señor Roland Croes a señala y a agrega cu tur e servicionan di rednan social manera, entre otro, TikTok a bira mas grandi. Nan tur a crece enormemente den e tempo ey. Pero no esey so, economicamente, como compania, no tabata tin biahamento, pero diripiente bo ta cumpra bo servicio pa por desaroya, pasobra negoshinan mester a sigui.
