Taskforce encuanto Short-Term Vacation Rentals a reuni cu Ministro

ORANJESTAD (AAN): Despues cu Diahuebs siman pasa Gobierno di Aruba a anuncia su intencion pa introduci un maneho nobo pa Short-Term Vacation Rentals (STR),

riba Diaranson e Taskforce interministerial encarga cu e proceso aki a reuni pa inicia cu e preparacionnan necesario pa su implementacion.

   E Taskforce, cu ta consisti di representantenan di e ministerionan di Finansa y Asuntonan Economico, Infrastructura, Turismo y Salubridad Publico, lo concentra den e prome fase aki riba preparacion di un sistema di registracion digital, elaboracion di e condicionnan necesario y coordinacion di e siguiente pasonan di e plan di accion aproba pa Conseho di Minister.

   E meta di Gobierno ta pa crea mas claridad, structura y siguransa den un sector cu, a traves di e añanan, a bira un parti importante di nos economia y producto turistico. E maneho nobo ta parti di un esfuerzo pa establece un marco mas claro y adecuado, cu ta tene cuenta tanto cu e realidad actual di e sector como cu e interes general di Aruba.

  Den e contexto aki, registracion ta representa un paso importante. E lo permiti Gobierno obtene un bista mas completo y confiabel di e actividadnan existente, identifica e diferente situacionnan den e sector y dispone di informacion necesario pa fundamenta decisionnan di maneho pa futuro.

   Cu e reunion di awe, nos ta dal un siguiente paso den e preparacion pa implementa e maneho aki di forma coordina, balansa y transparente.