ORANJESTAD (AAN): Durante un conferencia di prensa diaranson mainta, Minister di Husticia, mr. drs. Arthur Dowers,
a anuncia cu e periodo di transicion di Trayecto 4 di e programa Hunto pa Progreso ta yega na su fin dia 31 october 2026. E anuncio aki ta particularmente importante pa un grupo di 120 persona cu ainda no a regularisa nan situacion di estadia na Aruba mediante e trayecto regular di admision.
Na october 2025, e prome grupo di personanan cu a haci peticion pa Trayecto 4 di Hunto pa Progreso a haya un permiso temporal cu un valides di un aña. E periodo aki tabata destina pa duna e personanan concerni e oportunidad pa busca un donado di trabao of garante y asina haci e transicion pa e trayecto regular di admision, conforme e condicionnan y rekisitonan aplicabel.
Sinembargo, segun e cifranan actual, ainda tin 120 persona di e prome grupo aki cu no a logra completa e transicion. Den algun caso, e personanan no a logra haya un donado di trabao of garante dispuesto pa firma pa nan, mientras cu otronan a opta pa no busca un garante y mas bien traha como empresario independiente.
Minister Dowers a enfatisa cu e personanan concerni tin te dia 31 october 2026 pa regularisa nan situacion y cumpli cu e rekisitonan necesario pa pasa pa e trayecto regular.
E titular di husticia a aclara cu e permiso temporal otorga bao di Trayecto 4 no ta extendibel. Esaki ta nifica cu personanan cu no logra regularisa nan situacion prome cu nan permiso vence, no por sigui keda na Aruba riba base di e mesun permiso temporal.
Conforme e procedura aplicabel, e personanan aki lo dispone di un periodo di 30 dia, conta for di e fecha di vencimento di nan permiso temporal, pa regla nan asuntonan personal y organisa nan salida for di Aruba.
Minister Dowers a subraya cu e proposito di Trayecto 4 tabata pa ofrece un oportunidad temporal di transicion pa un situacion di estadia regular, y no pa crea un forma di estadia indefini of un permiso cu por renoba automaticamente.
E mandatario ta haci un yamada na tur persona cu ainda ta den e situacion aki pa tuma accion inmediatamente y no warda te ultimo momento pa busca un donado di trabao of garante y completa e procedura necesario.
Finalmente, Minister Dowers a enfatisa cu un maneho di admision efectivo ta exigi responsabilidad y cumplimento di e condicionnan estableci. E oportunidad ofreci pa medio di Hunto pa Progreso mester conduci na un situacion di estadia regular, respetando e leynan di Aruba.
Si tin cualkier pregunta, por haci esaki libremente via e WhatsApp di DIMAS, (+297) 569-8173 of pasa na servicio di recepcion di DIMAS.
