Minister Ursell Arends tocante Ley di Cacho:
*Prome tabata mata 5 mil cacho pa aña na Aruba
*Banda di Ley Bienestar di Animal a introduci un maneho
ORANJESTAD (AAN) – Den entrevista cu Minister Ursell Arends, el a elabora tocante e Ley di Cacho, y a indica cu Aruba a bay di un pais cu tabata mata 5 mil cacho pa aña pa bay pa 36 cacho cu a wordo poni drumi, desde cu el a bira Minister, te cu luna pasa.
“Y no pa motibo cu nos kier a pone nan drumi, pero si e cacho no por a wordo rescata mas of si nan tabata cachonan agresivo cu mester a pone nan drumi. Esey ta un diferencia compara cu dia y anochi, pues bay di 5 mil cacho pa aña bay pa 36 cacho durante e tres ultimo añanan” e dignatario a subraya, agregando cu esaki ta un adelanto enorme.
E mandatario a bisa cu pa loke ta trata e fundacionnan cu tin hopi cacho y pushi, mester tene cuenta cu nan ta manda e mayoria di cachonan aki, como adopcion na Merca.
“Desde 1 di Augustus di e aña aki, tin reglanan nobo. Cada cacho y pushi cu mester wordo manda, na prome lugar mester ta steriliza of castra, mester tin microchip y por lo menos seis luna bieu”, e dignatario a indica.
El a agrega cu esaki ta pone cu e peso a wordo poni riba e fundacionnan, pasobra pa nan por haya un hende pa adopta, nan no por manda mas, por ehemplo, un puppy di diez siman; nan mester warda p’e cacho of pushi yega seis luna bieu, prome cu manda nan Merca. El a reitera cu esaki tambe ta pone un peso riba e fundacionnan.
LEY DI BIENESTAR D ANIMAL:
E mandatario a bisa cu pa loke ta trata e Ley di Bienestar di Animal, fuera cu tin un ley a introduci tambe un maneho.
“Nos a haci rondanan di consulta cu tur stakeholders cu e ley aki tin efecto riba dje; e veterinarionan y tur otro instancia den nos comunidad: Stima mi Steriliza mi, ATA, AHATA, mirando cu e aspecto aki, tambe ta pone un imagen negativo, ora e turistanan ta post tur esaki riba social media. Dus, nos a haya tur nan input, nos a haci dos anochi di consulta publico, un na MFA Savaneta y un na MFA Paradera, henter comunidad a participa, hasta nos a ricibi varios mensahe digital y tambe input, durante e dos lunanan di consulta, nan ta bezig ta wordo ‘verwerk’ na e momentonan aki, pa e ley por cana su caminda pa yega Raad van Advies y despues bay Parlamento di Aruba”, Minister Arends a señala.
El a subraya cu esaki ta un compromiso cu el a haci cu comunidad y ta zorg pa esaki wordo cumpli.
