Tanki nobo di awa na Alto Vista a cuminsa haya forma

ORANJESTAD (AAN): E trabao pa crea un tanki mucho mas grandi pa awa potabel riba sero na Alto Vista a drenta un etapa nobo.

   Segun WEB Aruba NV a splica, durante luna di Maart 2024 cu a pasa, nan a completa e fase di basha beton pa asina forma e fundeshi di concrete.

   Awor ta sigui cu construccion di e structura (‘dome’) di e tanki nobo di awa, combina cu instalacion di loke e contratista ta yama ‘stiffener ring,’ un renchi cual ta duna sosten proporcional na e structura y na mes momento ta aumenta e resistencia en general di e tanki di awa.

   Pues por lo pronto, e area di Noord ta sigui ricibi awa for di e.o. pompnan instala na Paradera pa tur hende keda haya awa.  Si acaso bo ta biba na Noord y ta nota cu tin problema cu presion, of ta mira algo raro den area di e tanki nobo aki, por contact WEB Aruba NV na 280-4600 of WhatsApp di WEB Chat na 525-4600.