Opinion di lector:
ORANJESTAD (AAN): Un lector ta comenta cu den prensa local - cu regularidad - ta sali un cantidad di comentario di organisacionnan cu ta pretende di papia den nomber di e adultonan mayor.
E pregunta cu ta presenta ta si e organisacionnan ey a puntra e adultonan mayor mes pa nan opinion of ta opinion y interes di e organisacionnan ta wordo vocifera den prensa?
Un organisacion respeta manera OPPA cu ta representa - den mayoria - empleadonan publico retira, tin e posibilidad unico pa sondea/puntra opinion di su miembronan di forma directo riba tur tereno cu ta toca su miembronan y asina presenta Gobierno cu posibel solucionnan na interes general di un grupo importante di adultonan mayor di Aruba.
OPPA a yega di tene of ta tene sondeo/encuesta regular bou di su miembronan?
Aparte di OPPA sigur sigur tin otro organisacionnan representando - di un of otro forma -adultonan mayor cu por aporta cu informacionnan importante y necesario pa Gobierno forma un maneho practico y efectivo basa riba necesidad real di e adultonan mayor mes.
Kico ta loke falta den tur e informacionnan cu prensa local ta publica riba adultonan mayor? Falta e “bos”, e “opinion”, e “desicion” di e adulto mayor mes!
No por sigui planea y forma maneho basa riba interes di e organisacionnan, mester cuminsa puntra e adultonan mayor mes!
E peticion ta dirigi na Gobierno y na tur e organisacionnan pa “join” otro y laga un instancia neutral cu experticio, bin cu sondeo/encuesta - di forma regular - bou di e adultonan mayor mes pa puntra nan pa e solucionnan mas practico y efectivo cu nan ta desea.
