Director di AZV, Edwin Jacobs:
ORANJESTAD (AAN)—Director di AZV, Edwin Jacobs a splica den entrevista cu DIARIO, cu semper cu AZV ta manda un pashent na Colombia cu ta un emergencia, ta asigna un “casemanager” cu ta un persona cu ta traha na AZV y cu por keda den contacto cu e pashent.
E funcionario aki lo por follow up cu OES, specialista, etc. E persona cu ta bay afo ta yame y dune tur informacion tocante kico e ta bay haci, kico por spera, y semper e ta bira e persona di contacto pa e asegurado. E ta accesible den oranan di oficina, y e por duna e pashent su email.
“E casemanager nos tin’e on call solamente pa casonan di emergencia cu tin cu bay afo. Semper ta pasa cu tin casonan di emergencia cu mester busca un air ambulance y un clinica pa e pashent, anto tin un medico na turno cerca nos, y tin e colega aki tambe on call, cu ta percura pa e proceso aki. Pero no despues di oranan di oficina” Jacobs a menciona.
