Tamaño promedio di poblacion di animalnan salvahe a baha mundialmente

Living Planet Report WWF 2024:

*Reduccion mas grandi den Latino America y region di Caribe 

ORANJESTAD (AAN)/Gland, Suisa:  A pesar di casonan exitoso, manera e poblacion di e turtuga berde cu a mehora, mundialmente naturalesa ta sigui bay atras. Segun e Living Planet Report (LPR) 2024 di WWF, e poblacion di animalnan salvage a keda reduci cu 73% durante e ultimo 50 añanan.

            Den regionnan di Latino America y Caribe a observa e bahada mas grandi, cual ta 95%. E raport ta indica cu nos planeta ta yegando na un punto critico y den e siguiente 5 aña lo tin mester di un esfuerso grandi riba escala mundial pa combati e crisis di clima y naturalesa. 

Accion masal
            E siguiente 5 añanan ta crucial pa e futuro di nos planeta, pero nos tin e poder y e oportunidad pa cambia e ruta. WWF ta hasi un yamada na gobiernonan pa aumenta fondonan disponibel pa un accion masal, cu mester bini for di fuentenan publico y priva. Nan mester alinea maneho di clima, naturalesa y desaroyo mas miho.

             Gobierno y companianan mester stop cu actividadnan cu ta daña biodiversidad y clima, y uza e fondonan pa actividadnan cu ta sostene e obhetivonan mundial.

            Arjan de Groene, coordinado di Wereld Natuur Fonds pa e region Caribe, ta splica:
“E reduccion di poblacion di animalnan salvage den e region di Caribe ta mustra cu e urgencia pa actua tin un prioridad mas halto cu nunca. Aunke e impacto di diferente menasa ta serio, tin tambe casonan cu ta duna speransa, manera e stabilisacion di e poblacion di turtuga berde den e region Caribe despues di decadanan di mas proteccion. Nos ta wak tambe cu algun ‘super coral’ ta sobrebibi a pesar di e menasanan constante cu nan ta enfrenta. Si nos uni forza entre e region di Caribe Hulandes, Colombia, Guyananan y e region mas grandi, ainda nos por preserva y reconstrui e luganan y especienan unico cu ta esencial pa nos sobrevivencia.” 

Cambionan den poblacion

            E Living Planet Index (LPI) ta sigui e patronchi den poblacion di especienan for di 1970 te cu 2020. E ta uza dato di mas o menos 35.000 movimento di poblacion di 5.495 especie, incluyendo anfibio, para, pisca, mamifero y reptil.

            Cambionan den tamaño di poblacion ta funciona como un señal tempran di riesgo di extincion y ta indica con sano un ecosistema ta. E reduccion mas rapido a tuma luga den Latino America y region di Caribe cu un bahada di 95%. Africa ta sigui cu 76%, y Asia y Pacifico cu 60%. Algun especie ta mustra tendencia preocupante. Por ehempel, dolfijn ros di riu den Amazonas a baha cu 65%. E cantidad di neishinan di ‘lederschildpad’ na Guyana y Trinidad y Tobago a keda reduci cu 95%. Na nivel mundial, algun poblacion di pisca cu ta ser maneha a mustra un mehoracion den e ultimonan añanan, mientras otronan a keda stabil.

Menasanan
            Tin un caida mas grandi (-85%) cerca especienan cu ta biba den awa dushi, sigui pa esnan cu ta biba riba tera (-69%) y e especienan marino (-56%). E menasa mas grandi pa animalnan salvahe ta perdida di habitat, sigui pa explotacion excesivo, especienan invasivo y malesanan. Produccion di cuminda ta e motibo principal di perdida di habitat riba tera, loke ta causa perdida di biodiversidad y emision di gasnan cu efecto di ‘broeicas’.

            Mas o menos 90% di deforestacion  ta tuma luga pa crea tereno pa agricultura, principalmente den regionnan tropico y suptropico. Esaki a trece un bahada grandi den e poblacion di animalnan salvahe den Latino America, Africa y Asia-Pacifico.

            Cambio di clima ta un menasa adicional den Latino America y region di Caribe, caminda e poblacion a baha cu 95%. Afortunadamente, WWF a mira tambe un reduccion di algun menasa. E poblacion di turtuga berde a stabilisa door cu e hortamento di nan webonan y consumo di turtuga a bira menos den e ultimo decadanan.