Un cultura mas positivo por reduci abuso di nos grandinan
Bo sa cu 1 den 6 adulto mayor na mundo ta wordo abusa. Esaki ta 141 miyon victima pa aña, Akinan nos ta papiando di abuso fisico, pues pone man riba hende grandi. Tambe por ta abuso emocional y abuso psicologico por ehempel, menasa, insulta, of ta rebaha e persona di edad.
Ademas, abuso por ta den e area financiero, pues famia ta mishi cu placa cu ta di persona di edad of ta manipula pa keda cu herencia. Negligencia, tambe ta un forma di abuso. Akinan nos no ta percura p’e persona tin su necesidadnan basico, manera cuminda, luga apropia pa biba, of no por haya su remedinan. Y pa ultimo abuso sexual. Tur esakinan ta tipo di abuso cu por tuma luga si nos no duna oido of atencion na nos grandinan.
P’e motibo aki mi ta kere den un cultura mas positivo pa Aruba. Un cultura mas positivo ta encera cu nos lo bay reconoce, cu nos grandinan ta e fundeshi di sabidurianan existente den nos comunidad. Nos grandinan tin e experencia di nan logronan y nan fayonan cu por ser traspasa p’e siguiente generacion. E cultura mas positivo ta pone nos identifica e cosnan cu no ta corecto cu ta pasa rond di nos y rond di nos grandinan y cu por ser raporta y asina nos por reduci e abusonan aki a base di actua y percura pa tin consecuencia pa esnan cu a comete e abuso.
Abo ta stima bo mama, bo tata, bo welo, wela of famia grandi cercano? Abo ta stima bo mes?
Ban cuminsa na cultiva un cultura mas positivo caminda nos por mehora y pone atencion riba comportacion cu no ta corecto y asina por aumenta e posibilidad cu nos grandi nan tambe por disfruta di nan bida na un manera trankilo manera tur otro ta desea.
Nos grandinan a haci hopi pa nos y merece un trato igual y trankil pa e contribucion cu nan a duna den sociedad di un manera of otro. Y pa ultimo abo tambe lo bira grandi, ki trato abo lo desea?
Skirbi pa Gillmar Werleman
