Gino Goeloe di WGK:
ORANJESTAD(AAN)—Director di Wit Gele Kruis, señor Gino Goeloe, den entrevista cu DIARIO a splica cu e instancia cu ta haci control riba casnan di cuido di grandinan, ta IVA (Inspeccion di Salud Aruba).
Ora cu WGK ta señala algo cu por ta pasando den un cas di cuido, nan ta manda carta pa IVA, pasobra si nan cana drenta cas di cuido, tin cu ta permiti nan drenta y tin cu no ta hacie. Ora cu WGK no ta wordo laga drenta, nan sa cu tin algo cu no ta bon, pero IVA si tin e mandato pa yega y haci inspeccion.
“Mi sa cu tin cas di cuido cu a haya inspeccion di IVA den un temporada, y cu un par di nan riba casonan cu no a bay bon, y hopi tabata casonan cu tabata tin mas cliente den e casnan, cu loke nan por carga.
Por ehemplo, cu den camber por tin dos cliente, pero nan tin cuater cliente den un camber chikito, manera sardinchi riba otro, loke no mag”, Goeloe a splica.
El a agrega cu door di wak esey ta wak mas cos, por ehemplo e condicion di higiene, e parti di cuido, y Inspectie tin wowo riba esnan cu no ta cumpli cu ley.
“Mi sa si cu Inspectie cu Minister Ursell Arends a bin cu un trayecto pa diferente di e casnan aki, pa nan mehora nan servicio cu opleiding, pasobra hopi biaha, manera mi a duna di conoce, no tin hende educa pa traha cu e clientenan. Nan tin personanan cu ta ama di cas; no tin nada di cuido. Cuida hende, duna remedi, no ta somaar bo ta hacie. Bo mester sa ki remedi bo ta duna, pa ken bo ta dun’e y pakico, y kico bo por haci si e persona aki ta haya efecto di e remedi”, señor Goeloe a indica.
El a agrega cu e parti di enfermeria ta algo cu e persona cu ta duna e servicio mester a studia p’e. No algo cu por haci con cu ta, parti remedi pa loco, y pesey semper WGK a keda riba cu mester bin control riguroso riba tur e casnan di cuido priva, pa wak si nan ta eficiente y adecua. “E tarea ta di IVA pa controla. Inspectie mester haci e controlnan y den e caso aki mi sa cu nan ta haciendo esaki, mi no sa cuanto biaha sea pa siman, pa luna of pa aña, pero mi sa si cu nan ta haci control y sigur ora ta bin keho, nan ta bay di biaha! Y tambe DVG ora tin keho ta bay di biaha, wak e situacion, nan ta evalua y wak kico nan ta haci cu e situacion”, director di WGK a declara. El a agrega cu esaki WGK ta keda señala y monitor tambe y manera nan tende un keho nan ta actua di biaha.
