Taisha Marsdin a gradua for di Albeda College como Patissier

ORANJESTAD (AAN): Dia 10 di juli, Taisha Marsdin a gradua for di Albeda College como Patissier.

For di chikito, e tabata hopi creativo: den cushina, den pintamento y te asta ta pinta cuadra. Door di su habilidad creativo Taisha a  siña su mes con pa traha cu fondant y decora bolo.

            Taisha a termina su estudio na Abraham de Veer School, despues a gradua den Culinary Arts na EPI Aruba, a traha algun aña,  y despues a muda pa Hulanda den 2019 pa sigui su estudio.

Taisha a completa varios estudio den e ultimo añanan;

• Uitvoerend Bakker (Niv. 2 – den 2 aña)
• Zelfstandig Werkende Bakker (Niv. 3 – cu normal ta 3 aña, pero e a logra esaki den 2 aña)
• Patissier (Niv. 4 – den 1 aña, a caba gradua)

            Pa su proyecto final, Taisha a scoge Aruba como su tema. Den esey, e mester a crea deserts (cos dushi) cu ta bay cu e tema y cu ingredientenan tipico di Aruba manera ponche crema.

            Su presentacion tabata consisti di un showstuk di e California Lighthouse, traha 100% di chuculati cu e escudo di Aruba riba dje, y  varios otro elemento di nos flora y fauna, tur traha na man y cu por come.

Tambe, Taisha a traha pa su proyecto final:
• Friandises (pastry chikito)
• Plated dessert
• Gebak
• Desserttaart
• Doorhaal bonbons y Gevuld vorm bonbons

            Taisha a haya un  9 pa su proyecto final. Su mama, ruman, welo y wela, tantanan, primo y demas famia ta hopi orguyoso cu e logro di Taisha. DIARIO tambe ta felicita Taisha cu e bunita logro aki. Hopi exito.