Prome grupo comercial a adopta proyecto di reforestacion

ORANJESTAD (AAN):  Diahuebs atardi, a tuma luga un ceremonia special na e rotonde chikito entre ex-Ministerio Publico,

Renaissance Wind Creek Hotel y Bestuurskantoor. Ta trata aki di un ceremonia den cual Grupo Bennu, a duna un impulso na e vision nacional di reforestacion plantando un cantidad di mata nativo riba e rotonde.

            Na e ocasion special aki, Prome Minister mr. Mike Eman, encarga cu e maneho di naturalesa, a comparti un experencia personal locual a contribui na e sentimento profundo cu e mandatario tin pa e naturalesa di Aruba.

           Na 2020, durante tratamento di chemoterapia di Prome Minister su casa Doina durante pandemia di Covid19, tabata den un estado di salud delicado cu un sistema imunologico reduci door di e tratamento. Ademas Prome Minister mester a percura pa keda isola for di comunidad pa evita cu Covid toca su casa cu tur consecuencia pa su estado di salud. Canando den patio di su cas, Prome Minister a topa cu un pochi mata cu un pida cadushi chikito tabata crece pero wantando na e plastic di e pochi y casi nada di tera, pero determina pa sobrevivi. Cu hopi delicadesa, a saca e cadushi chikito y a planta esaki den un pochi mas grandi y a cuida esaki mescos cu a cuida su casa. Awe Doina ta saludabel y e cadushi mientrastanto a crece y a bira alrededor di 60 cm.

            Durante e mesun periodo, Prome Minister Eman a dedica na skirbi un buki riba e alma di Aruba, “Ziel van Aruba”, den cual a sondea kico ta e elementonan cu a haci Aruba asina special cu nos por a travesa momentonan dificil. Esakinan a sirbi como un afeccion special pa naturalesa y cultura y na momento cu a yega momento pa forma un Gabinete, Prome Minister a reflexiona riba kico mas e por contribui cune pa nos pais. E afeccion aki pa nos naturalesa, a pone Prome Minister scohe pa e cartera di naturalesa y cultura.

“Nos bida a wordo forma door di nos naturalesa, e caracter di nos hendenan, e cultura di nos hendenan a wordo forma door di nos naturalesa”, Prome Minister a expresa. “E mesun secura a haci nos hendenan persistente, a haci nos hendenan determina, pero a haci nos tambe hendenan cu ta traha den solidaridad cu otro, pasobra cosecha di un tabata wordo parti cu otro cu no tabatin”.

            Cu inicio di e programa di reforestacion, ta duna e plan nacional di reforestacion un impulso importante. Cada mata ta representa ken nos ta y ken nos por ta y e contribucion cu lo haci cu e reforestacion cu 100 mil mata, lo yuda nos naturalesa, cambio climatico y aparencia di Aruba.

            Prome Minister a gradici Grupo Bennu pa adopta e rotonde aki y inclui e vision den e renobacion. Ademas Prome Minister a gradici alrededor di 27 stakeholders cu ta trahando hunto cu Gobierno riba e plan nacional di reforestacion y ta planificando e caminda cu mester cana pa completa e obhetivo di planta 100 mil mata den e siguiente 4 aña.