Ta organisa den luna di mei diferente tayer interactivo pa conecta adultonan mayor cu hobennan

Damara Rasmijn di Directie Ouderenzaken:

Directie Ouderenzaken (DOZ), pa medio di su vocero Damara Rasmijn, ta orguyoso di presenta “Generation Swap”, un iniciativa inspirador di intercambio cu tin como meta pa uni adultonan mayor y hobennan di Aruba den un ambiente di siña di otro, conexion y intercambio di experiencia. 

Generation Swap lo consisti di diferente tayer interactivo unda participantenan di 60+ y hobennan di 14 aña bay ariba lo haya oportunidad pa conoce otro miho, comparti conocemento y fortalece e relacion entre generacionnan. 

Entre e actividadnan prepara tin tayernan di cushina, vision board, storytelling, piscamento y digitalisacion. Cada actividad ta enfoca riba creatividad, cultura, comunicacion y innovacion, y ta duna tanto adultonan mayor como hobennan e espacio pa siña di otro y traha hunto pa un futuro mas conecta. 

Un aspecto special di e proyecto ta e intercambio autentico entre generacionnan: desde comparti receta tradiconal y conta y traha storia for di artenan cu nan mes ta crea, te siña habilidadnan digital moderno y preserva tradicionnan local manera piscamento.

Como clausura di e iniciativa, lo tin un Conferencia Nacional “Generation Swap”, unda adultonan mayor y hobennan lo reuni pa continua e dialogo y intercambio di experiencia. 

Esnan interesa na participa den e diferente tayernan por tuma contacto cu DOZ pa mas informacion y inscripcion. Pa mas informacion tambe y pa e fechanan di cada tayer, por bishita paginanan social di Directie Ouderenzaken.