Liberato Hoek, Hefe Servicio Ambulans:
ORANJESTAD (AAN) Señor Liberato Hoek, Hefe di Ambulance, a señala, den entrevista cu Matutino DIARIO, cu e servicio di ambulance ta sigui crece, y cada aña nan ta haya mas melding.
“Mester compronde cu e trafico mes a bira mas druk, tin mas auto riba caminda, banda di esey e envehecemento ta hunga un rol, y esaki ta refleha bek den nos servicio, pues hopi di nos meldingnan ta pa hendenan cu ta sufri di malesa cronico”, señor Hoek a indica.
El a bisa cu ainda tin un grupo di persona cu no ta compronde kico ta casonan di emergencia, y banda di esey tin hende cu ta purba haci maluso di e servicio di ambulance, pa purba di drenta hospital pa wordo atendi mas lihe, sin tene cuenta cu ora ambulance yega toch otro triage ta wordo haci, pues e persona tin cu sinta warda toch.
Hoek a acentua cu e plan di Servicio di Ambulance ta pa sigui crece y upgrade nan mes. “Mi tin cu bisa cu e servicio si bo compare cu un par di aña atras, a bira hopi mas profesional aworaki, cu nos ta papia mas di cuido di ambulance envez cu transporte di ambulance. E cuido profesional ta cuminza na cas, riba caya, dus, e ta eigenlijk pa bienestar di e pashent e cuido ta. Y cerca nos, e pashent ta central”, Liberato Hoek, hefe di Servicio di Ambulance a subraya.
