Ta invita tur artesano pa haci entrega di tur material nobo cu NO tin Seyo Nacional di Artesania ainda

ORANJESTAD (AAN):  Departamento di Cultura Aruba (DCA) conhuntamente cu e Comision di Seyo Nacional di Artesania Aruba ta invita artesanonan

pa haci entrega di tur material nobo cu NO tin Seyo Nacional di Artesania ainda. 

            Dia 1 di October 2021 lo tuma luga e siguiente evaluacion pa e aña aki, caminda e comision ta bini hunto pa pasa riba tur e criterianan necesario relaciona cu e producto pa bini na remarca pa e Seyo Nacional di Artesania Aruba.

            Ta haci un yamada na e artesanonan pa entrega tur nan producto nobo pa mas tarda dia 29 di September 2021 prome cu merdia na DCA.

            E proceso di aplicacion ta tuma luga na Departamento di Cultura Aruba cual por cierto a muda pa John F. Kennedy Educational Center cu ta keda na Stadionweg # 37, Oranjestad Aruba, (retonde banda di Cas di Cultura).

            P’esaki mester *yena e formulario di aplicacion, *mester trece un identificacion valido, *un pasfoto, *como tambe un comprobante di adres.

            Criterianan pa bini na remarca di un Seyo Nacional di Artesania Aruba ta:

• Mester ta traha na man. (No cu machine, pero cu herment manual

  senciyo).

• Autentico, Diseño Original.
• Consistencia den (re-) produccion di diseño y modelo.
• Grado di experticio (tradicional) den trahamento di e producto.
• E producto mester ta traha na Aruba.
• Grado di uzo di material local.
• Grado cu e producto ta refleha tecnicanan di artesania tradicional.

            Artesania ta un arte caminda cu creatividad den forma di e arte y cultura ta haya bida. Ban sigui enrikece y contribui na nos productonan artesanal local. Y aporta nos industria creativo.

            Ta danki na nos artesanonan cu mas y mas nos tin obranan artistico local y di Aruba mes.