Ta importante pa empodera studiantenan di Aruba

Minister Wendrick Cicilia:

ORANJESTAD (AAN): Manera DIARIO a trece dilanti, recien Minister Wendrick Cicilia tabata presente durante e Clint Whitfield Outstanding Student Award 2025.

   Durante e anochi a honra e studiantenan cu a desplega excelencia riba nivel academico. Kiwanis Club of Aruba conhuntamente cu Clint Whitfield Foundation a reconoce diferente studiante. “Esaki ta un momento sumamente special p’e hobennan”, asina Minister Wendrick Cicilia a expresa. E hobennan tabata presente hunto cu nan famia y docentenan.

   E hobennan ta e futuro di nos pais, e tesoronan di mas precioso y e recursonan di mas valioso cu nos tin como pais. E hobennan reconoci lo ta esnan encarga di carga un gran parti di e desaroyo di Aruba, promove cambionan moderno y innovativo den futuro. Sin duda e reconocemento ta un manera pa empodera nos hobennan cu ta destacando den e mundo academico pero tambe ta un momento pa convence nan pa bin bek Aruba na momento cu nan termina nan estudio.

   Minister Cicilia a expresa: “Nos a comunica na nan cu Aruba ta nos cas y nos cas mester di diferente renobacion y cambio, p’esey ta importante pa nan bin bek cas y hunto nos haci e renobacionnan necesario y crea un miho Aruba.”

   For di Ministerio di Labor lo pensa riba un maneho pa atrae nos profesionalnan bek despues cu nan termina nan estudio afo.