Representante di Wild Fork na Merca ta splica con unico e productonan aki ta

ORANJESTAD (AAN): Awe Ling & Sons ta bay tin un dia special di 11’or di mainta te cu 2’or di atardi, pa clientenan conoce nan producto nobo y exclusivo yama Wild Fork.

Diabierna DIARIO a haci un entrevista cu Logan Misewicz, e representante di Wild Fork cu a bin Aruba pa introduci e producto ‘premium’ nobo aki.

“E dianan aki ta hopi special pasobra esaki ta bay ta e prome biaha cu Wild Fork, un marca premium di carni ta bay ta disponibel pa Aruba, na un manera exclusivo via Ling & Sons”.

Locual ta haci e diferencia pa Wild Fork ta e calidad, e variedad di producto y tambe e experiencia unico ora cu bo come un di e productonan, segun Misewicz.

El a sigui bisa cu Wild Fork tin un variedad grandi di carni di calidad halto, for di galiña organico certifica pa USDA, ‘grass fed organic beef’, carni di porco premium,  carni di carne di Australia y tambe articulonan special condimenta caba y cla pa cushina.

Misewicz a splica cu Wild Fork ta unico mirando cu cada un di e productonan a pasa den un proceso perfecto di maduracion, unda ta ‘blast freeze’ esakinan tambe na e punto mas halto di frescura.

Esaki ta pone cu e sabor y nutrientenan ta wordo perfectamente conserva, cu ta comparable cu e mihor restaurantnan cu ta sirbi steak y otro tipo di carni.